Հեղեղումներից տուժածներին 1 քմ-ի դիմաց 180 հազար դրամ կտրամադրվի` նախկին 148 հազարի փոխարեն
ՀՀ կառավարությունը փոփոխեց 2024 թվականի մայիսյան հեղեղումներից տուժած բնակիչներին փոխհատուցելու մեխանիզմը՝ 1 քմ-ի դիմաց նվազագույն գինը 180 հազար դրամ դարձնելով։ Փոփոխության պատճառը, ըստ կառավարության, այն է, որ նախկինում սահմանված փոխհատուցման գումարը բավարար չէր նոր բնակարան ձեռք բերելու համար։
«Կառավարությունը դեռևս ամռանը հաստատել էր փոխհատուցման մեխանիզմ, ըստ որի՝ յուրաքանչյուր կորցրած բնակարանի կամ տան քմ-ի դիմաց հաշվարկվում էր 148.050 դրամ։ Սակայն այս թիվը, ինչպես պարզվել է տեղում իրականացված ուսումնասիրություններից, բավարար չէր, քանի որ Ալավերդիում և հարակից բնակավայրերում այդ գումարով բնակարան գնել պարզապես հնարավոր չէր»,– ասված է նախագծում։
Ըստ նախագծի՝ հաշվարկները կատարվելու են Կադաստրի կոմիտեի կողմից հրապարակված շուկայական միջինացված գների հիման վրա։ Դիմումների ներկայացման վերջնաժամկետը երկարաձգվում է մինչև 2025 թվականի սեպտեմբերի 15-ը։ Նախորդ որոշմամբ նախատեսված էր, որ բնակիչները պետք է դիմեն սահմանված կարգով փոխհատուցում ստանալու համար։ Սակայն Լոռու մարզպետարանի տվյալներով՝ Ալավերդիի մի շարք բնակիչներ չեն հասցրել ներկայացնել դիմումները։
Նախագիծը նաև հստակեցնում է, որ բնակարան գնելու վկայագիրը հնարավոր կլինի իրացնել միայն այն համայնքում, որտեղ շահառուն հաշվառված է։ Գործադիրի կարծիքով` այս պարտադիր պայմանն ուղղված է նրան, որ տուժածները չլքեն իրենց բնակավայրերը։
Հիշեցնենք` 2024–ի մայիսի 26–ի տեղատարափ անձրևներից հետո Լոռու և Տավուշի մարզերում Դեբեդ, Աղստև և Տաշիր գետերի վարարման հետևանքով 4 մարդ մահացավ։
Լոռու և Տավուշի մարզերի տուժած բնակավայրերը աղետի գոտի հայտարարվեցին։
