Թրամփը հետաձգել է Ռուսաստանի դեմ խոստացած պատժամիջոցները

ԱՄՆ նախագահ Դոնալդ Թրամփը որոշել է նոր պատժամիջոցներ չկիրառել Ռուսաստանի և նրա առևտրային գործընկերների նկատմամբ Վլադիմիր Պուտինի հետ հանդիպումից հետո: Հաշվի առնելով տեղի ունեցածը, չեմ կարծում, որ հիմա դրա մասին պետք է մտածեմ: Գուցե երկու կամ երեք շաբաթ անց մտածեմ դրա մասին, բայց մենք հիմա դրա մասին պետք չէ մտածենք: Այս մասին հայտնել է Թրամփը Fox News-ին տված հարցազրույցում։

Նրա խոսքով՝ Ռուսաստանի նախագահի հետ բանակցությունները շատ լավ են անցել:

«Դա շատ ջերմ հանդիպում էր: Կարծում եմ՝ մենք շատ մոտ ենք համաձայնության», - նշել է Սպիտակ տան ղեկավարը: Նա հավելել է, որ Պուտինը ոչ միայն աջակցում է Ուկրաինայում խաղաղության գաղափարին, այլև ցանկանում է, որ դա տեղի ունենա:

Թրամփը նշել է, որ հրադադարը և խաղաղ կարգավորումը այժմ կախված են Ուկրաինայի նախագահ Վլադիմիր Զելենսկիից և խորհուրդ է տվել Կիևին համաձայնության գալ Մոսկվայի հետ: Պուտինի հետ բանակցություններից առաջ Թրամփը հայտարարել է, որ եթե Ռուսաստանի նախագահը հրաժարվի դադարեցնել ռազմական գործողությունները Ուկրաինայում, նա կբախվի շատ լուրջ հետևանքների: Միևնույն ժամանակ, ամերիկացի առաջնորդը նշել է, որ եթե բանակցությունները հաջող լինեն, կարող է տեղի ունենալ Զելենսկիի հետ եռակողմ հանդիպում։

Հիշեցնենք՝ ԱՄՆ-Ռուսաստան գագաթնաժողովը տեղի է ունեցել Ալյասկայի Անքորիջ քաղաքում: Թրամփի և Պուտինի բանակցությունները տևել են 2 ժամ 45 րոպե, չնայած Ռուսաստանի նախագահի մամուլի քարտուղար Դմիտրի Պեսկովը հայտարարել է, որ դրանք կարող են տևել 6-7 ժամ: