Նիկոլ Փաշինյանը կմեկնի Ռուսաստան. Օվերչուկ
Հայաստանի վարչապետ Նիկոլ Փաշինյանը մոտ ապագայում կայցելի Ռուսաստան: Այս մասին լրագրողներին հայտնել է ՌԴ փոխվարչապետ Օվերչուկը։
Վերջին անգամ ՀՀ վարչապետը ՌԴ է այցելել հուլիսին, որտեղ նա մասնակցել է Ալթայում անցկացվող միջազգային բնապահպանական համաժողովին։
Հավելենք, որ ՌԴ փոխվարչապետ Ալեքսեյ Օվերչուկը հաջորդ շաբաթ Երևան կայցելի՝ քննարկելու Եվրասիական տնտեսական միությունում (ԵԱՏՄ) Հայաստանի աշխատանքը։
Նա լրագրողներին ասել է, որ ուղևորությունը նախապես է ծրագրվել։
«Այցը կապված է նրա հետ, որ Հայաստանի Հանրապետության նորմատիվ իրավական կարգավորման մեջ նորմատիվ իրավական ակտ (ՀՀ կառավարության որոշում) է առաջացել, որը, մեր կարծիքով, հակասում է ԵԱՏՄ իրավունքին», – պարզաբանել է ՌԴ փոխվարչապետը՝ հավելելով, որ այդ հարցը կքննարկվի Երևանում։
Քանի որ դրանից հետո Վաշինգտոնում արդեն եռակողմ հանդիպում է կայացել, ստորագրվել է հռչակագիր՝ Հայաստանի, ԱՄՆ-ի և Ադրբեջանի ղեկավարների մասնակցությամբ, ակնկալվում է, որ Օվերչուկը ՀՀ վարչապետ Նիկոլ Փաշինյանի հետ կքննարկի նաև բանակցությունների արդյունքները։
«Հնարավոր է` Նիկոլ Վովաևիչ Փաշինյանի հետ հանդիպում լինի և մենք որոշ նրբություններ քննարկենք, որոնք նախևառաջ կապված են Հարավային Կովկասի տարածաշրջանում հաղորդակցությունների ապաշրջափակման հետ», – ասել է ՌԴ փոխվարչապետը։
Նա նշել է, որ Ռուսաստանի համար կարևոր են Հարավային Կովկասում իր շահերին վերաբերող հարցերը, այդ թվում՝ երկաթուղային հաղորդակցությունների զարգացումը։
«Հաջորդ շաբաթվա վերջին նախատեսվում է հանդիպում նաև ադրբեջանական կողմի հետ, մենք այնտեղ ևս կքննարկենք այդ հարցերը, այնպես որ, շարժ կա», – հավելել է Օվերչուկը:
Հարցին` արդյոք այդ հանդիպումը կլինի Բաքվում, Օվերչուկը պատասխանել է, որ հանդիպումը «կկայանա Ռուսաստանում»:
