ՔՊ վարչության կազմը վստահ եմ, որ կփոխվի. Պապոյան
«Քաղաքացիական պայմանագիր» կուսակցության համաժողովին ընտրական ցուցակ չի ձևավորվելու, այդ համաժողովին նախատեսում ենք ընդունել նոր կանոնադրություն, նոր ծրագիր, և, իհարկե, նոր վարչության ընտրություններ են լինելու: Այդ մասին Կառավարության ճեպազրույցի ժամանակ ասաց ՀՀ էկոնոմիկայի նախարար Գևորգ Պապոյանը՝ անդրադառնալով կուսակցության՝ սեպտեմբերի 20-ին նախատեսվող համագումարին:
«Վարչության անդամի համար առաջադրումների և ինքնառաջադրումների փուլը սկսված չէ: Դա հուլիսի 1-19-ին է լինելու: Հիմա չկան և չեն էլ կարող լինել ինքնառաջադրումներ:
Իսկ թե «Քաղաքացիական պայմանագիր» կուսակցության վարչության կազմը կփոխվի՞ կամ ի՞նչ չափով կփոխվի, բնականաբար, ես վստահ եմ, որ ինչ-որ չափով կփոխվի, որովհետև մաքուր ժողովրդավարական ձևով է տեղի ունենում, ինչպես նախորդիվ»,- ասաց նա:
Անդրադառնալով վարչության կազմի նախորդ ընտրության արդյունքների վերահաշվարկին՝ Պապոյանն ընդգծեց՝ տեղի է ունեցել ոչ թե կեղծիք, այլ ձայների վերահաշվարկ, որի արդյունքում փոփոխություն է եղել:
«Սա նշանակում է, որ, այնուամենայնիվ, ընտրողների կամքը 100 տոկոսով արտահայտվել է: Այդպես կլիներ, եթե վերահաշվարկ տեղի չունենար, և ասեին՝ դե, վերահաշվարկ չի եղել»,- ասաց նա:
