Քոչարյանը մարդասպան է, իր ձեռքերը արյան մեջ են․ Ալեն Սիմոնյան
Հայաստանում Ռոբերտ Քոչարյանի նկատմամբ վերաբերմունքը վաղուց ձևավորված է։ Այս մասին ասել է Ազգային ժողովի նախագահ Ալեն Սիմոնյանն՝ անդրադառնալով ՀՀ երկրորդ նախագահի հարցազրույցին։
«Նույնիսկ պատերազմից հետո շատ մարդիկ, Հանրապետության հրապարակում նրա դեմքի ջղաձգումները տեսնելով, որոշել են գնալ քվեարկության, որ հանկարծ այդ օտարը, այդ մարդասպանը, այդ կոռումպացված անձնավորությունը, որ խոպան էր եկել իր թայֆով, հանկարծ չվերադառնա։ Իր մտածելակերպն օտար է հայ մարդուն, նա օտար է Հայաստանում, նա Հայաստանին վերաբերել է որպես խոպան․ եկել են՝ այստեղ փող աշխատելու, մարդ սպանելու։ Մարդասպաններ են»,- ասել է Սիմոնյանը։
Դիտարկմանը, թե ընտրություններում 20% ձայն է հավաքել, նա Քոչարյանին համեմատել է Հիտլերի հետ.
«Հիտլերն էլ է շատ տոկոսներ ստացել տարբեր տեղերում, բայց դա չի նշանակում, որ նա մարդասպան չէ»:
Պատասխանելով լրագրողի հարցին, թե Քոչարյանին ինքը տեսե՞լ է մարդ սպանելուց, Սիմոնյանն արձագանքել է. «Իսկ ինչու՞ պետք է ինչ-որ մեկը տեսնի մարդ սպանելու ժամանակ, Հիտլերին տեսե՞լ եք մարդ սպանելուց, ես էլ ասում եմ՝ համարում եմ, որ Ռոբերտ Քոչարյանը մարդասպան է, իր ձեռքերը արյան մեջ են»:
