Պետք է լավ հարաբերություններ կառուցել Թուրքիայի հետ. Քոչարյան
Փոքր երկիրը կարող է կոմպլեմենտար քաղաքականության մեջ լինի, սակայն չի կարող «շպագատ» իջնի։ Այս մասին լրագրողների հետ հանդիպման ժամանակ ասել է Հայաստանի 2–րդ նախագահ Ռոբերտ Քոչարյանը:
Քոչարյանի խոսքով` ՀՀ–ն այս տարածաշրջանում միայնակ չի կարող ապահովել իր անվտանգությունը, ի տարբերություն, օրինակ` էստոնիայի, որտեղ Փաշինյանը վեջերս եղել էր ու հիացած էր։ Քոչարյանի խոսքով` այդ երկիրը սահմանակից է ՌԴ-ին ու Եվրոպային, ու կարողացավ ինքնուրույն ապահովել իր անվտանգությունը։
«Մինչդեռ մեր երկրի դեպքում` դու քո ներսում ավելի կազմակերպված պետք է լինես, քո բանակով զբաղվես և աշխարհաքաղաքական հնարավոր գործընկերների հետ այն հարաբերությունները հաստատես, որը կկոմպենսացնի այն բացը, որ դու ունես։ Ես չեմ տեսնում, որ այս իշխանությունն այդ ուղղությամբ որևէ բան անում է»,- ասել է Քոչարյանը:
վերջինս նաև նշել է, որ եթե մտածենք Եվրոպան կարող է ՀՀ–ում որևէ անվտանգային հարց լուծել, դա միամտություն ու մանկամտություն է, նայելով, թե տարածաշրջանում ովքեր են մեր հարևանները։
«Մակրոնը կգրկախառնվի մեր վարաչպետի հետ, ինքը սիրում է գրկախառնվել, ու դրանով ամեն ինչ կավարտվի։ Հիմա կա երեք պետություն, որոնք կարող են դերակատար լինել մեր տարածաշրջանում` Ռուսաստանը, Թուրքիան, Իրանը։ Հիմա ո՞ր երկիրն է մեզ ավելի հոգեհարազատ, ո՞ր երկրի հետ են մեր տնտեսական կապերն ավելի ուժեղ, ո՞ր պետությունն է այդ երեքից ավելի հզոր իր պոտենցիալով ու մշակութային առումով մեզ ավելի մոտ։ Այստեղ այլընտրանք չկա, դա Ռուսաստանն է»,- ասել է Քոչարյանը:
Ըստ նրա` մեր անվտանգության համար պետք է այն, ինչ արվում էր ՀՀ առաջին նախագահից մինչև 3-րդ նախագահ` ոչ թե «շպագատով», այլ հստակ ռազմավարական հարաբերություններով առաջ գնալ։
«Չպետք է մոռանալ, որ Թուրքիայի սպառնալիքը շարունակում է մնալ. նրա նպատակն ակնհայտ է` մենք մի խորթ մարմին ենք մի մեծ քաղաքական պատկերի մեջ, որն ակնհայտ Թուրքիան այսօր հետապնդում է։ Հիմա դա իրենց ազգային շահն է, ու մենք չենք կարող իրենց դրա համար մեղադրել։ Պետք է հասկանանք` այս տարածաշրջանում Թուրքիային ո՞վ կարող է զսպել։ Ես կարծում եմ` Ռուսաստանը, որն իր պոտենցիալով ամենահզորն է»,- հավելել է Քոչարյանը:
Նա այն կարծիքին է, որ մենք պետք է փորձենք լավ հարաբերություններ կառուցել Թուրքիայի հետ, սակայն չպետք է շանտաժի ենթարկվենք։
2-րդ նախագահը նաև նշել է, որ պետք է շարունակել հարաբերությունները Ռուսաստանի հետ` ներառելով նաև Իրանի գործոնը, որը մեզ համար բարեկամ երկիր է, քանի որ ընդհանուր շահեր ունենք։
