Մենք ունենք հստակ կարմիր գիծ․ Իրանում դա թույլ չենք տա․ Ուիթքոֆ
Միացյալ Նահանգների հիմնարար դիրքորոշումն այն է, որ Իրանը չի կարող հարստացնել ուրան: Այս մասին ABC News-ին ասել է Մերձավոր Արևելքի հարցերով նախագահ Դոնալդ Թրամփի հատուկ բանագնաց Սթիվ Ուիթքոֆը։
«Մենք ունենք մեկ շատ հստակ կարմիր գիծ, դա ուրանի հարստացումն է: Մենք չենք կարող թույլ տալ, որ Իրանն ունենա հարստացման կարողությունների նույնիսկ 1 տոկոսը: Ամեն ինչ սկսվում է մեր սկզբունքային դիրքորոշումից, այն է՝ գործարքից, որը չի ներառում հարստացման հնարավորությունը», - ասել է Սթիվ Ուիթքոֆը։
Նման միտք ավելի վաղ հայտնել էր ԱՄՆ պետքարտուղար Մարկո Ռուբիոն։ Նա ասել է, որ ԱՄՆ-ն ցանկանում է ստիպել Իրանին հրաժարվել միջուկային հավակնություններից։ Նրա խոսքով՝ Վաշինգտոնը ցանկանում է երաշխավորել, որ Թեհրանը երբեք միջուկային զենք ձեռք չբերի։
«Եթե դուք կարող եք հարստացնել ուրանը ցանկացած մակարդակով, ապա ըստ էության կարող եք այն հարստացնել մինչև սպառազինության մակարդակը շատ արագ», - ասել էր դիվանագետը:
Իրանի արտգործնախարար Աբբաս Արաղչին հակադարձել է, որ Իրանն ուրանը հարստացնելու է՝ անկախ այն բանից, թե արդյոք ԱՄՆ-ի հետ համաձայնություն ձեռք կբերվի։
«ԱՄՆ-ն շահագրգռված է երաշխիքներով, որ Իրանը միջուկային զենք չի ստանա: Նման համաձայնությունը հասանելի է, և մենք պատրաստ ենք լուրջ երկխոսության՝ հասնելու այնպիսի լուծման, որը հավերժ կապահովի այդ արդյունքը: Բայց Իրանում ուրանի հարստացումը կշարունակվի՝ անկախ նրանից, համաձայնություն ձեռք բերվի, թե ոչ»,- գրել է Արաղչին սոցցանցում:
Հավելենք՝ Օմանում կայացել է ԱՄՆ-ի և Իրանի միջև անուղղակի բանակցությունների չորրորդ փուլը։ Իրանական և ամերիկյան պատվիրակությունները գլխավորում էին Արաղչին և ԱՄՆ նախագահի հատուկ բանագնաց Սթիվ Ուիթքոֆը։ Իրանի դիվանագիտական առաքելության ղեկավարը հայտարարել է մի շարք զիջումների գնալու պատրաստակամության մասին, և որ կողմերը համաձայնել են շարունակել բանակցությունները։
