Իր ամենամեծ ձեռքբերումը հայտնի երգչուհու ամուսին լինելն է․ Սիմոնյան

Ազգային ժողովի նախագահ Ալեն Սիմոնյանը վստահեցնում է՝ «Հայաստան» խմբակցության պատգամավոր Լևոն Քոչարյանի պահվածքը քաղաքական հետևանք է ունենալու։

«Այն, ինչ իրեն թույլ է տվել պարոն Քոչարյանի փոքր տղան, պետք է քաղաքական հետևանք ունենա ու ունենալու է, թող որևէ մեկը չկասկածի»,- լրագրողների հետ զրույցում ասել է նա։

Երբ Սիմոնյանին հիշեցրեցին, որ Լևոն Քոչարյանը զգուշացրել է՝ դուրս է շպրտելու իրեն ԱԺ նախագահությունից ու քանի որ բարձր է տեղը, շատ ցավոտ է լինելու՝ Ալեն Սիմոնյանն արձագանքել է. «Պետք է հասկանանք, թե ով է նա, բացի հայտնի երգչուհու ամուսին լինելն ու մարդասպան, չընտրված երկրի ղեկավարի տղա լինելը՝ ինքը ո՞վ է, ուզում եմ հասկանալ»։

«Ո՞վ է նա, նա ոչ մեկ է, իր անձնական ամենամեծ ձեռքբերումը հայտնի երգչուհու ամուսին լինելն է։ Երբ ինքը գիտակցի, թե ինքը ով է, նոր կկարողանա հոխորտալ»,- նշեց Սիմոնյանը։

ԱԺ նախագահը խոստովանեց՝ շատ սուր ելույթներ է ունենում, բայց գիծ կա, որը երբեք չի անցնում։

«Եթե ես այդ գիծն անցնեմ, ես եմ ավելի վատ իրավիճակում հայտնվում։ Ինքն անփորձ ջահել է, հենց ես երկրում չէի, նոր եկավ, ելույթ ունեցավ, բայց էլի գալու է չէ՞ դահլիճ»,- ասել է Սիմոնյանը։