Թուրքիա-ԱՄՆ-Ուկրաինա եռակողմ հանդիպման մեկնարկը տրված է
Ստամբուլի Դոլմաբահչեի նախագահական գրասենյակում մեկնարկել է Թուրքիայի, ԱՄՆ-ի և Ուկրաինայի պատվիրակությունների եռակողմ հանդիպումը: Այս մասին հայտնում են թուրքական լրատվամիջոցները:
Բանակցությունները մեկնարկել են Թուրքիայի արտգործնախարար Հաքան Ֆիդանի նախագահությամբ:
ԱՄՆ պատվիրակությունը գլխավորում է պետքարտուղար Մարկո Ռուբիոն։ Ամերիկյան պատվիրակության կազմում են նաև Անկարայում ԱՄՆ դեսպան Թոմ Բարաքը և Ուկրաինայի հարցով նախագահ Դոնալդ Թրամփի հատուկ ներկայացուցիչ Քիթ Քելլոգը:
Հիշեցնենք` Թուրքիայում Ռուսաստանի և Ուկրաինայի միջև բանակցություններին ռուսական պատվիրակությունը գլխավորում է նախագահի օգնական Վլադիմիր Մեդինսկին: Պատվիրակության կազմում են նաև փոխարտգործնախարար Միխայիլ Գալուզինը, պաշտպանության փոխնախարար Ալեքսանդր Ֆոմինը։ Ուկրաինական պատվիրակության կազմում են Ուկրաինայի նախագահի գրասենյակի ղեկավար Անդրեյ Երմակը, պաշտպանության նախարար Ռուստեմ Ումերովը և արտաքին գործերի նախարար Անդրեյ Սիբիգան:
