Ո՞վ է հիշում, թե որ կետին ենք հասել` ինչ է սպառնում ՀՀ-ին առաջիկայում. Տիգրան Աբրահամյան

Վերջին շրջանում նիստերին ավելի շատ քննարկվում են ռազբորկաները, քֆուրները, այլանդակ պահվածքները, ամեն ինչ, բացի նրանից, ինչն այս պահին սպառնում է ՀՀ-ին և կախված է ՀՀ-ի գլխին, խորհրդարանական ճեպազրույցների ժամանակ հայտարարել է «Պատիվ ունեմ» խմբակցության պատգամավոր Տիգրան Աբրահամյանը։

Նա ավելացրեց, որ այսօր ոչ ոք չի հիշում, թե ուր ենք հասել բանակցային գործընթացում:

«Ո՞վ է հիշում, թե որ կետին ենք հասել, քանի որ դրանից է կախված, թե ինչ է սպառնում ՀՀ-ին և ինչ է առաջիկայում սպասվում։ Հանրությանը հայտարարվեց, որ Ադրբեջանի հետ բանակցություններն ավարտվել են, փաստաթուղթը, որը բաղացած է 17 կետից, չի հրապարակվում, թաքցվում է հասարակությունից»։

Պատգամավորը խոսել է նաև այն կարծիքների մասին, որ շատերը որպես վարչապետի թեկնածու իրեն են առաջարկում և տեսնում այդ պաշտոնում:

«Իհարկե, շատ շնորհակալ եմ, որ ձեր պատկերացումներում ես կարող եմ դիտարկվել որպես վարչապետի թեկնածու, շատ կարևոր պատասխանատվություն է: Նախաձեռնողները, որոնք դիմել են «Պատիվ ունեմ», «Հայաստան» խմբակցություններին, ինչպես նաև արտախորհրդարանական ուժերի հետ են կոնսուլտացիաներ անում, ունեն որոշակի պատկերացումներ և դրանք ենթադրում են թեկնածուի առաջին պլան բերելը և քննարկման առարկա դարձնելը։ Պրոցեսի հետ կապված մենք մեր հստակ դիրքորոշումն արտահայտել ենք մեր խմբակցության հայտարարությամբ, գործընթացը, երբ հասնի թեկնածուի առաջադրմանը, այդ ժամանակ մեր լրացուցիչ դիրքորոշումն այդ մասով կարտահայտենք»,- հավելել է պատգամավորը: