Վարդան Ղուկասյանը՝ վարչապետի թեկնածու առաջադրվելու հավանականության մասին

Եթե շատ մարդիկ, որոնց չի ընտրում ժողովուրդը, եթե իրենք կանչեն ու ասեն՝ այո մենք գտնում ենք, որ դու պետք է ստանձնես այդ պարտականությունը, իրենց համաձայնությունը տան և իմ կողիքին կանգնեն, այո: Այս մասին ասել է Գյումրու նորընտիր քաղաքապետ Վարդան Ղուկասյանը, պատասխանելով այն հարցին, թե 2026 թվականին հնարավո՞ր է, որ վարչապետի թեկնածու առաջադրվի:

Գյումրիի քաղաքապետարանում լրագրողների հետ զրույցում Գյումրիի քաղաքապետ ընտրված Վարդան Ղուկասյանը նաև հայտարարել է, որ կողմ է միութենական պետությանը՝ Բելառուսի սկզբունքով: 

Նա վերահաստատեց նախընտրական իր տված խոստումները, թե Ռուսաստանից գործարարներ են գնալու Գյումրի: «Այստեղ մենք պետք է հիվանդանոցի խնդիր լուծենք Ռուսաստանի հետ, այստեղ պետք է համատեղ գործարանների, ձեռնարկությունների խնդիր լուծենք և կտեսնեք, որ այդ ամեն ինչը կլինի»,- ասաց նա:

Նա նաև առաջարկ արեց արևմտամետ ուժերին, որ նրանք էլ Եվրոպայից ու Ամերիկայից ներդրումներ բերեն և ինքը տարածք էլ կտարամադրի, ամեն ինչ էլ կանի:

Դիտարկմանը՝ իրեն կարող են քննադատել, որ ասաց՝ կողմ է միութենական պետությանը, նա արձագանքեց. «Ոչինչ թող քննադատեն, ես հեչ չեմ վախենում, ես շատ ճիշտ եմ մտածոեւմ: Մենք պետք է Բելառուսի սկզբունքով պահենք այս ամեն ինչը»:

Ինչ վերաբերում անկախությանը, նա ասաց՝ դա է անկախությունը: «Հիմա Լուկաշենկո՞ն է լավ նստում, թե՝ մնացած երկրները: Նայեք թե Լուկաշենկոն իրեն ոնց է պահում: Մենք այս հարևանները որ ունենք, չենք կարող փոխել, մենք, ցավոք սրտի, եվրոպայում չենք գտնվում: Մեզ պետք է այնպիսի մի երկիր, որ հիմնվենք դրա վրա: Ես այդպես եմ գտնում, բայց պաշտպանելով Հայաստանի անկախությունը և շատ-շատ խնդիրներ, նաև սուվերեն վիճակը»,- ասաց նա:

Նշենք, որ այսօր Գյումրիի ավագանին 18 կողմ 0 զեմ ձայներով քաղաքապետ է ընտրել Վարդան Ղուկասյանին: ՔՊ-ն չի մասնակցել նիստին:

Վարչապետ Նիկոլ Փաշինյանը անդրադարձել է Գյումրիի ընտրություններին։