ՄԱԿ-ի գլխավոր քարտուղարը կոչ է արել ԱՄՆ-ին և Իրանին դադարեցնել ռազմական գործողությունները

ՄԱԿ-ի գլխավոր քարտուղար Անտոնիու Գուտերեշը խիստ մտահոգություն է հայտնել ԱՄՆ-ի և Իրանի միջև գիշերվա ընթացքում վերսկսված փոխադարձ կրակոցների կապակցությամբ։ Այս մասին հայտարարել է ՄԱԿ-ի գլխավոր քարտուղարի խոսնակ Ստեֆան Դյուժարիկը։

Նրա խոսքով՝ Գուտերեշին հատկապես անհանգստացրել են խաղաղ բնակչության շրջանում զոհերի մասին հաղորդումները, այդ թվում՝ Իրանում հարսանեկան արարողության ուղղությամբ ենթադրյալ հարվածի մասին տեղեկությունը։

ՄԱԿ-ի գլխավոր քարտուղարը դատապարտել է խաղաղ բնակչության դեմ բոլոր հարձակումները և հիշեցրել, որ կողմերը պարտավոր են պահպանել միջազգային մարդասիրական իրավունքի պահանջները։

Գուտերեշը կոչ է արել անհապաղ դադարեցնել ռազմական գործողությունները, զսպվածություն ցուցաբերել և խուսափել այնպիսի գործողություններից ու հռետորաբանությունից, որոնք կարող են ավելի սրել իրավիճակը։

ՄԱԿ-ում զգուշացրել են, որ հետագա էսկալացիան կարող է կործանարար հետևանքներ ունենալ ինչպես խաղաղ բնակչության, այնպես էլ ամբողջ տարածաշրջանի համար։

Գուտերեշը նաև ԱՄՆ-ին և Իրանին կոչ է արել շտապ վերադառնալ դիվանագիտական ճանապարհին՝ ընդգծելով, որ համապարփակ և երկարատև կարգավորման հնարավոր է հասնել միայն երկխոսության և բանակցությունների միջոցով։