Պատգամավորը՝ սահմանին վերջին տարիներին իրականացրած ամրաշինական աշխատանքների մասին

Վերջին երեք տարիների ընթացքում Հայաստանն Ադրբեջանի հետ սահմանին իրականացրել է աննախադեպ ծավալի ամրաշինական աշխատանքներ՝ նպատակ ունենալով բարձրացնել զինծառայողների պաշտպանվածության մակարդակը։ Այս մասին Ազգային ժողովում Հայաստանի Հանրապետության կառավարության ծրագրի (2021-2026 թթ.) 2024 թվականի կատարման ընթացքի և արդյունքների վերաբերյալ զեկույցի քննարկման ժամանակ հայտարարեց ԱԺ պաշտպանության և անվտանգության հարցերի մշտական հանձնաժողովի նախագահի տեղակալ Արմեն Խաչատրյանը։ 

«Մենք այսօր ունենք ամրաշինական կառույցների աննախադեպ մեծ ծավալների աշխատանք։ Վերջին երեք տարում մենք կարողացել ենք իրականացնել հսկայական ծավալի աշխատանք»,-նշեց պատգամավորը։

Նրա խոսքով՝ այս մասին, գուցե, շատ չի խոսվում, բայց զինվորն արդեն գիտի, որ իր պաշտպանվածությունն ապահովված է։ 

«Նման մակարդակի ամրաշինական ապահովություն նախկինում երբեք չի եղել»,- հավելեց Արմեն Խաչատրյանը և միաժամանակ նշեց, որ կան հատվածներ, որտեղ աշխատանքներն առայժմ ամբողջությամբ իրականացված չեն։

«Իհարկե, դեռ կան տեղեր, որտեղ աշխատանքները չեն իրականացվել, բայց դա բնական է՝ նման ծավալի աշխատանքը հնարավոր չէ ավարտել մեկ-երկու տարում։ Բայց հիմա, երբ նայում եմ արդյունքներին, ինքս երբեմն զարմանում եմ, թե ինչքան մեծածավալ աշխատանք է կատարվել այս կարճ ժամանակում»,-եզրափակեց Խաչատրյանը։

Մանրամասները՝ տեսանյութում։