Պուտինը Հայաստանին ընտրության առաջ է կանգնեցնում. BBC

Ռուսաստանի նախագահ Վլադիմիր Պուտինը Հայաստանի վարչապետ Նիկոլ Փաշինյանի հետ Բիշքեկում կայացած հանդիպման ժամանակ պահանջել է հստակեցնել Հայաստանի ընտրությունը Եվրամիության և Եվրասիական տնտեսական միության միջև։ Այս մասին գրում է BBC-ն։

Պուտինի խոսքով՝ ԵՄ-ին անդամակցության գործընթաց սկսելու մասին Հայաստանի ընդունած օրենքը փաստացի նշանակում է ԵԱՏՄ-ից դուրս գալու մասին հայտարարություն, քանի որ միաժամանակ երկու միությունների անդամ լինել հնարավոր չէ։

Փաշինյանը հակադարձել է, որ Հայաստանը գիտակցում է՝ գալու է կոնկրետ ընտրություն կատարելու ժամանակը, սակայն, ըստ նրա, այդ պահը դեռ չի հասել։

«Փաստացի հիմա մենք այլընտրանք չունենք, այդ այլընտրանքն իրականում ստեղծված չէ»,- ասել է Փաշինյանը։

Պուտինն իր հերթին առաջարկել է կատարել ընտրությունը և «փակել թեման»։

BBC-ն նշում է, որ հանդիպման արդյունքում կողմերը պայմանավորվել են շարունակել քննարկումները Մոսկվայում, որտեղ Փաշինյանն ու Պուտինը նախատեսում են ավելի մանրամասն անդրադառնալ ինչպես այս, այնպես էլ հայ-ռուսական հարաբերություններում կուտակված մյուս խնդիրներին։

Պարբերականը նաև ընդգծում է, որ հանրաքվեի անցկացման համար Հայաստանում առկա է սահմանադրական խոչընդոտ․ Փաշինյանի իշխող ուժը խորհրդարանում չունի դրա համար անհրաժեշտ մեծամասնությունը։