Դա կախված է Պուտինի որոշումից․ Պեսկով

Ռուսաստանի և Ուկրաինայի էներգետիկ օբյեկտներին հարվածների մորատորիումի երկարաձգման որոշումը կախված կլինի ՌԴ նախագահ Վլադիմիր Պուտինից։ Բայց նախ Մոսկվան Վաշինգտոնի հետ կքննարկի Կիևի կողմից կատարված բոլոր խախտումները: Այս մասին ՏԱՍՍ-ին հայտնել  է ՌԴ նախագահի մամուլի քարտուղար Դմիտրի Պեսկովը։

«Դա կախված կլինի նախագահ Պուտինի որոշումից»,- ասել է նա՝ պատասխանելով այն հարցին, թե արդյոք համաձայնագիրը կերկարաձգվի ապրիլի 16-ին:

Պեսկովը հիշեցրել է, որ «մորատորիումը, ըստ էության, չի պահպանվել ուկրաինական կողմից»։

«Հետևաբար, իհարկե, անհրաժեշտ կլինի վերլուծել այս 30 օրը: Ամերիկացիների հետ, հավանաբար, տեղեկություններ և նկատառումներ փոխանակելու համար: Եվ այդ ժամանակ գերագույն հրամանատարը՝ նախագահը, որոշում կկայացնի»,- ամփոփել է Կրեմլի ներկայացուցիչը։

Մարտի 18-ին Ռուսաստանի և ԱՄՆ նախագահներ Վլադիմիր Պուտինը և Դոնալդ Թրամփը հեռախոսազրույց են ունեցել, որում քննարկել են Ուկրաինայում տիրող իրավիճակը։ Պուտինը համաձայնել է էներգետիկ ենթակառուցվածքների օբյեկտների վրա հարձակումներից 30 օրով զերծ մնալու առաջարկին և հրաման է տվել ՌԴ պաշտպանության նախարարությանը։ Ավելի ուշ Վլադիմիր Զելենսկին ասել է, որ Ուկրաինան կաջակցի էներգետիկ օբյեկտների վրա հարձակումները դադարեցնելու առաջարկին։