Ուկրաինային՝ օգնել, բայց տոկոսով. ԱՄՆ-ի նոր խաղի կանոնները
«The New York Times»-ի տեղեկություններով՝ ԱՄՆ-Ուկրաինա հանքարդյունաբերական գործարքի նոր նախագծում բացակայում է Կիեւին անվտանգության երաշխիքներ տրամադրելու մասին դրույթը։
Փոխարենը, փաստաթղթի թարմացված տարբերակում կրկին ընդգրկվել են այն պահանջները, որոնք նախկինում մերժվել էին Կիեւի կողմից։ Դրանց համաձայն՝ Վաշինգտոնն է վերահսկելու Ուկրաինայի վերականգնման հիմնադրամի գործունեությունը, իսկ Կիեւը պարտավոր է վերադարձնել ԱՄՆ-ից ստացած ամբողջական աջակցությունը։
Նախագծի համաձայն՝ ԱՄՆ-ը կպահանջի հիմնադրամի կողմից ստացվող ամբողջ շահույթը, մինչև Ուկրաինան չփոխհատուցի ստացած օգնության համարժեք գումարը՝ գումարած տարեկան 4%։
Չնայած կոնկրետ պարտքի չափը նշված չէ, ավելի վաղ շրջանառվում էր 350 միլիարդ դոլարի մասին խոսք։ Այժմ դրան ավելանում է նաև տարեկան 4 տոկոս շահույթ։
Ապրիլի 11-ին Ուկրաինայի պատվիրակությունը ժամանել է Վաշինգտոն՝ հանքարդյունաբերական պայմանագրի շուրջ բանակցություններ վարելու նպատակով։ Ուկրաինայի փոխվարչապետ Օլգա Ստեֆանիշինան հայտնել է, որ բանակցությունները կտևեն երկու օր և կունենան տեխնիկական բնույթ՝ առանց բարձր պաշտոնյաների մասնակցության։
