Դիանա Գասպարյանը տուգանվել է 300 հազար դրամով
Կոռուպցիայի կանխարգելման հանձնաժողովը Վաղարշապատի համայնքապետ Դիանա Գասպարյանին տուգանել է 300 հազար դրամով։
Պարզվում է, որ հանձնաժողովը հետաքննություն է սկսել «Ազատություն» լրատվամիջոցի հրապարակման հիման վրա, որը վերաբերում էր հնարավոր շահերի բախման դեպքին։
Ըստ այդ հրապարակման՝ Գասպարյանը պայմանագիր էր կնքել սեղմված բնական գազի մատակարարման վերաբերյալ իր սկեսրայրին՝ Աշոտ Միրզոյանին պատկանող գազալցակայանի հետ։ Գործարքի արժեքը կազմել է շուրջ 13.6 միլիոն դրամ։
Հանրային ծառայության մասին օրենքի համաձայն՝ եթե պաշտոնյան իր լիազորությունների շրջանակում գործողություն է կատարում կամ որոշում է ընդունում, որն ունակ է առաջացնել շահերի բախում, ապա նա պարտավոր է այդ մասին գրավոր ծանուցել վերադասին։ Քանի որ համայնքապետերը վերադաս չեն ունենում, նրանք պետք է հայտարարություն ներկայացնեն Կոռուպցիայի կանխարգելման հանձնաժողովին։ Գասպարյանը դա չի արել։
Հանձնաժողովը եզրակացրել է, որ Դիանա Գասպարյանը, կնքելով այդ պայմանագիրը, կատարել է գործողություն, որը կարող էր առաջացնել շահերի բախման ռիսկեր։
