Ո՞ր դեպքում ընտանիքը չի օգտվի անապահովության նոր համակարգից
ՀՀ կառավարության կողմից ներդրված ընտանիքի անապահովության գնահատման նոր համակարգում սահմանվեց սոցիալական աջակցության տրամադրումը բացառող նոր գործոն։ Այդ մասին համապատասխան որոշումն ընդունվեց ՀՀ կառավարության այսօրվա նիստի ժամանակ։
«Եթե ընտանիքի անդամներից որևէ մեկը հանդիսանում է վարկային պայմանագրի կատարման ապահովման նպատակով գործող երաշխավորության պայմանագրով երաշխավոր, եթե երաշխավորության պայմանագրի գումարը գերազանցում է 100․000 դրամը կամ համարժեք արժույթը, ապա նա չի ստանա աջակցություն»,– ասված է որոշման մեջ։
Այս դրույթները նախատեսվում է, որ կտարածվեն այս տարվա ապրիլի 21-ից հետո ներկայացված դիմումների վրա։
Նշվում է, որ ընտանիքի անապահովության գնահատման նոր համակարգի գնահատման կարգը, պայմանները, պետական և ՏԻՄ–երից, կազմակերպություններից տվյալներ ստանալու և տրամադրելու կարգը ՀՀ կառավարությունը հաստատել է այս տարվա հունվարի 9-ին։
Որոշմամբ նոր համակարգը ներդրվել է 2025 թ. մարտի 17-ից ՀՀ Կոտայքի և Սյունիքի մարզերում, իսկ 2026 թվականի հունվարի 1-ից գնահատման նոր համակարգը կներդրվի ամբողջ հանրապետությունում։
