Եթե Մոսկվան չհամաձայնի, պատժամիջոցների մասին օրինագիծը կընդունվի

Ամերիկացի հանրապետական ​​սենատոր Լինդսի Գրեմը և նրա  գործընկեր Ռիչարդ Բլումենթալը ներկայացրել են  օրինագիծ, որը նախատեսում է առաջնային և երկրորդային պատժամիջոցներ սահմանել Ռուսաստանի դեմ, եթե Մոսկվան չհամաձայնի Ուկրաինայի հետ հրադադարին: Այս մասին հաղորդել է The Hill-ը:


«Ռուսաստանի դեմ պատժամիջոցները ենթադրում են մաքսատուրքերի սահմանում այն երկրների համար, որոնք գնում են ռուսական նավթ, գազ, ուրան և այլ ապրանքներ»,- ասվում է օրինագծի վերաբերյալ տարածված մամուլի հաղորդագրությունում։


Հստակեցվում է, որ պատժամիջոցները նախատեսում են 500 տոկոսի չափով մաքսատուրքերի սահմանում։


«Ռուսաստանի դեմ այդ պատժամիջոցներն արդեն պատրաստ են և կստանան երկկուսակցական ճնշող աջակցություն, եթե քվեարկության համար ներկայացվեն Սենատ և Ներկայացուցիչների պալատ»,- հայտարարել են օրենսդիրները:


Օրինագիծը պաշտպանել է երկու կուսակցությունների 50 օրենսդիրներից բաղկացած խումբը: Նրանք նշել են, որ սատարում են ԱՄՆ նախագահ Դոնալդ Թրամփի ձգտումը՝ «հասնելու կայուն, արդար և արժանապատիվ խաղաղության»։