Պատճառ կար, որ ես հայտնվել եմ այս վիճակում. Աղազարյան

Ես այդպիսի տեղեկություն չունեմ, քանի որ չեմ շփվում ՔՊ-ական պատգամավորների հետ: Այս մասին, այսօր՝ մարտի 26-ին, ԱԺ-ում լրագրողների հետ զրույցում նշեց ԱԺ պատգամավոր Հովիկ Աղազարյանը՝ անդրադառնալով տեղեկություններին, որ SMS են ուղարկել բոլոր ՔՊ-ական պատգամավորներին, որ իրեն անձեռնմխելիությունից զրկելու հարցով իրենց կողմ քվեարկությունը նկարեն:

Հարցին՝ հավատո՞ւմ եք, որ իրավապահ համակարգն արդար կլինի իր նկատմամբ, Աղազարյանը պատասխանեց. «Ես կարող եմ պաշտպանվել: Անարդարացի են ճնշումները, բայց ես կարող եմ պաշտպանվել: Իհարկե, սա քաղաքական հետապնդում է: Ես իմ ելույթում ասելու եմ որոշակի բաներ, այս ամեն ինչը հո օդից չընկա՞վ, ինչ-որ հիմք կար, ինչ-որ պատճառ կար, որ ես հայտնվել եմ այս վիճակում»:

Նա ընդգծեց, որ առաջին պատճառը Նիկոլ Փաշինյանին մերժելն է:

Լրագրողների հարցին՝ ավելի լավ չէ՞ր լինի չմերժեր Նիկոլ Փաշինյանին եւ դներ մանդատը եւ չհայտնվեր այս վիճակում, Աղազարյանն արձագանքեց. «Բա ձեր նմաններին ո՞վ պաշտպաներ: Եթե ես որպես պատգամավոր չկարողանամ ինձ պաշտպանել, բա դուք ո՞նց եք պաշտպանվելու վաղը: Ես ժողովրդի ծառան եմ, ես պարտավոր եմ ինքս ինձ պաշտպանել, որպեսզի իմ պաշտպանությամբ նաև պաշտպանեմ ուրիշներին»: