Աղազարյանը 200-300 հազար դոլար կաշառք է պահանջել. Վարդապետայան

ՀՀ գլխավոր դատախազ Աննա Վարդապետյանը նախկին ՔՊ-ական, այժմ անկախ պատգամավոր Հովիկ Աղազարյանի դեմ երկու դրվագով մեղադրանք ներկայացրեց Ազգային ժողովում։

Վարդապետյանը խորհրդարանում հայտարարեց, որ քրեական գործի առաջին դրվագով Հովիկ Աղազարյանը կեղծ փաստաթղթերով և կաշառքի դիմաց մի քաղաքացու խոստացել է գյուղատնտեսական նշանակության կենդանիների արտահանում կազմակերպել։ Դատախազի խոսքով` արտահանումը պետք է լիներ պատգամավորի լիազորությունների չարաշահմամբ ՀՀ ՍԱՏՄ պաշտոնյաներին կաշառելու, ինչպես նաև առանց կենդանիներին կարանտինացնելու և կեղծ փաստաթղթերի միջոցով։

Այդ նպատակով Աղազարյանը 200-300 հազար դոլար կաշառք է պահանջել 150-200 գլուխ գյուղատնտեսական կենդանիներ ԱՄԷ արտահանելու համար։

«Անձն Աղազարյանին առաջարկել է նախնական 20 հազար դոլար, սակայն պատգամավորը հրաժարվել է` ասելով, որ իրեն պետք է վճարել նախապես պայմանավորված ամբողջ գումարը, որպեսզի նա էլ կարողանա փոխանցել համապատասխան պաշտոնյաներին»,– հայտարարեց Վարդապետյանը։

Քրեական գործի 2–րդ դրվագով, ըստ դատախազի, Աջափնյակում գտնվող թիվ 136 հիմական դպրոցի` վթարային վիճակում գտնվող շենքը քանդելու և փոխարենը հողատարածքի մի մասի վրա բազմաբնակարան շենք կառուցելու համար Աղազարյանը ոմն Արամ Մկրտչյանից պահանջել է 23 հազար դոլար և 300 հազար դրամ կաշառք։

2021 թվականից սկսած այս գումարը պետք է մաս-մաս վճարվեր Աղազարյանին, որպեսզի նա, իր պաշտոնեական լիազորությունները չարաշահելով, բնակելի շենք կառուցելու թույլտվություն ստանար իրավասու մարմիններից։ Վարդապետյանը նշեց, որ այս ամենը փաստող տեսանյութեր կան գործին կցված։

«Չնայած իր խոստմանը` Աղազարյանը չի կարողացել կազմակերպել իրավասու մարմիններից համապատասխան թույլտվություններ ստանալու խոստումը և միաժամանակ չի վերադարձրել գումարը Արամ Մկրտչյանին»,-ընդգծեց դատախազը։

Վարդապետյանը նշեց, որ Ազգային ժողովի նիստից հետո քրեական վարույթն ամբողջությամբ կուղարկվի դատարան։