Ռասմուսենը` Հայաստանում ԵՄ առաքելության հեռանալու մասին
Չեմ կարծում, որ եթե Հայաստանում ԵՄ առաքելությունը հեռանա սահմանից, դա կհանգեցնի բացասական հետեւանքների։ Այս մասին մարտի 20-ին Իջեւանում լրագրողների հետ հանդիպման ժամանակ հայտնել է «Rasmussen Global» քաղաքական խորհրդատվական միջազգային կազմակերպության հիմնադիր եւ նախագահ, ՆԱՏՕ նախկին գլխավոր քարտուղար Անդերս Ֆոգ Ռասմուսենը։
Նա դա բացատրել է նրանով, որ խաղաղության պայմանագրի ստորագրումը կնշանակի հասնել փոխվստահության կողմերի միջեւ։
Ռասմուսենը նշել է, որ դրանից հետո այլ մեխանիզմներ կհայտնվեն՝ սահմանին իրավիճակը վերահսկելու համար, որպեսզի կանխվեն համաձայնագրի դրույթների խախտումները։
Նա միաժամանակ նշել է, որ խոսքը երրորդ ուժերի առկայության մասին չէ. «Ես գիտեմ, որ Բաքուն խաղաղության պայմանագրի շրջանակում պահանջում է ԵՄ դիտորդներին հեռացնել սահմանից»,- հիշեցրել է ՆԱՏՕ նախկին գլխավոր քարտուղարը։ Նրա խոսքով՝ Երեւանը, ըստ էության, համաձայնել է համապատասխան կերպով լուծել այդ հարցը։
«Ընդ որում՝ կարող եմ ասել, որ ԵՄ դիտորդները լրտեսներ չեն։ Նրանք զինված չեն, նրանք չեզոք են եւ պարզապես հետեւում են, թե ինչ է կատարվում սահմանին»,- եզրափակել է Ռասմուսենը։
