ՀՀ անկախությանը սպառնացող վտանգները գալիս են մի քանի երկրից. Քրիստինե Գրիգորյան

Ադրբեջանի հարձակման հավանականության մասին փաստերն այս պահին բացակայում են։ Այս մասին Ազգային ժողովում լրագրողների հետ զրույցում ասաց ՀՀ արտաքին հետախուզության ծառայության պետ Քրիստինե Գրիգորյանը` անդրադառնալով հարցին` արդյոք կա՞ Ադրբեջանի կողմից հարձակման հնարավորություն` հաշվի առնելով նրանց վերջին հաղորդագրությունները։

«Ադրբեջանի հարձակման հավանականությունը բարձր գնահատելու համար անհրաժեշտ փաստերի և ազդակների համախումբն այս պահին բացակայում է, բայց իրավիճակը շատ արագ է փոխվում, և մեր ծառայությունում հետևում են իրավիճակին»,– ընդգծեց նա։

Հարցին` բացի Թուրքիայից ու Ադրբեջանից, ո՞ր երկրներն են սպառնալիք ներկայացնում Հայաստանի համար, Գրիգորյանը նշեց. «ՀՀ անկախությանն ու սուվերենությանը սպառնացող վտանգները գալիս են մի քանի երկրից»։

Անդրադառնալով Բաքվում պահվող հայ գերիների մասին հարցին` Գրիգորյանը նշեց, որ ծառայությունն իր մանդատի շրջանակում իր հիմնական գործառույթն է հետախուզական տեղեկություններ հավաքել, ամփոփել ու ներկայացնել քաղաքական ղեկավարությանը։ Ինչ վերաբերում է գերիների հարցին, ապա այս տիպի հումանիտար հարցերը նույնպես արտաքին հետախուզության ծառայության աշխատանքի թիրախն են։

«Այլ մանրամասների մասին հարցերը մեր ծառայությանը մասնագիտական տեսանկյունից կոռեկտ չէ»,– ասաց Գրիգորյանը։