ՀՀ-ն հարկադրված կլինի միանալ հակառուսական պատժամիջոցների ներդրմանը. Շոյգու

Եվրասիական տնտեսական միությունից (ԵԱՏՄ) Հայաստանի հնարավոր դուրս գալը Եվրամիությանն անդամակցելու բանակցությունների փուլում կարող է էական վնաս հասցնել Երևանի տնտեսությանը: Այս մասին ասել է ՌԴ Անվտանգության խորհրդի քարտուղար Սերգեյ Շոյգուն, նրա խոսքերը փոխանցում է Interfax-ը:

Նա ընդգծել է, որ ԵԱՏՄ-ից դուրս գալը Եվրամիությանն անդամակցելու բանակցային գործընթացի փուլում Հայաստանին կարժենա ՀՆԱ-ի 30-40 տոկոսը 

«Երևանը պետք է վերակառուցի ստանդարտների և սերտիֆիկացման ամբողջ համակարգը՝ ԵՄ պահանջներին համապատասխանելու համար։ Գործնականում դա նշանակում է նվազագույնը լճացում, իսկ առավելագույնը՝ գոյություն ունեցող արդյունաբերության, այդ թվում՝ մետաղագործության, սննդի և թեթև արդյունաբերության ոչնչացում»,- ասել է Շոյգուն։

«Հայաստանը պետք է միանա Եվրոպական պատժամիջոցներին և Եվրամիության ռազմաքաղաքական որոշումներին, այդ թվում այնպիսի գործիքների շրջանակներում, ինչպիսիք են ԵՄ անվտանգության և պաշտպանության ընդհանուր քաղաքականությունը, ինչպես նաև Խաղաղության եվրոպական հիմնադրամը», - ասել է Շոյգուն։

Նա հայտարարել է, որ եթե Երևանը միանա Եվրամիությանը, ապա պարտավոր կլինի մաքսատուրքեր սահմանել Ռուսաստանից և ԵԱՏՄ այլ երկրներից ապրանքների վրա։

«Բնականաբար, ԵԱՏՄ երկրների հետ մաքսային միության և ազատ առևտրի մասին խոսք չի լինի, մենք նույնպես ստիպված կլինենք լքել ԱՊՀ ազատ առևտրի գոտին»,- ասել է ՌԴ Անվտանգության խորհրդի քարտուղարը։

«Եվրամիություն հնարավոր անդամակցության դեպքում Հայաստանը ոչ միայն տնտեսական խնդիրների առաջ կկանգնի, այլև հարկադրված կլինի միանալ հակառուսական պատժամիջոցների ներդրմանը, Բրյուսելը պնդելու է դա»,- նշել է Շոյգուն։

Նա ասել է, որ պատժամիջոցներն ուղղված կլինեն ոչ միայն Ռուսաստանի և Բելառուսի, այլ նաև Իրանի դեմ։

Շոյգուն նշել է, որ Ռուսաստանից Հայաստան դրամական փոխանցումներն ապահովում են երկրի ՀՆԱ-ի մոտավորապես 15%-ը։

«Զգալի մասն է կազմում Ռուսաստանում աշխատող Հայաստանի քաղաքացիների տրանսֆերտները: Հաշվի առնելով, որ շատերը ստիպված կլինեն վերադառնալ հայրենիք, իսկ Եվրոպան նրանց չի սպասում, վստահաբար կարող ենք կանխատեսել, որ արտերկրից դրամական մուտքերը Հայաստանի տնտեսություն կնվազեն, այն էլ՝ բավականին զգալի»,- ասել է ՌԴ Անվտանգության խորհրդի քարտուղարը։

Նրա խոսքով, ԵՄ-ին ինտեգրվելու համար ՀՀ քաղաքացիները պետք է հրաժարվեն ԵԱՏՄ միասնական աշխատաշուկայի տրամադրած արտոնություններից։ «Այդ թվում՝ առանց թույլտվությունների զբաղվածություն, պարզեցված գրանցում, անվճար բժշկական օգնություն, անվճար կրթություն և շատ ավելին»,- ասել է ՌԴ Անվտանգության խորհրդի քարտուղարը։

«Ինչ վերաբերում է Ռուսաստանին, ապա ԵԱՏՄ-ից Հայաստանի դուրս գալուց մեր կորուստները էական չեն լինի։ ՀՆԱ-ի անկումը չի գերազանցի տոկոսի կոտորակները՝ մեր գնահատականներով՝ երեքից չորս հարյուրերորդական», - ասել է Շոյգուն։