Կարող ենք փորձաքննության ուղարկել երկու երկրների սահմանադրությունները. Ալեն Սիմոնյան

ԱԺ նախագահ Ալեն Սիմոնյանը հայտարարել է, որ պատրաստ են քննարկել և հասկանալ՝ արդյո՞ք ՀՀ սահմանադրության մեջ Ադրբեջանի նկատմամբ տարածքային պահանջներ կան, թե ոչ, և նույնը՝ այդ երկրի սահմանադրության դեպքում:

«Վերջ ի վերջո, այդ հարցը ո՞նց է լուծվելու: Մենք ասում ենք, որ մեր ներպետական ինստիտուտներն անցնելուց հետո նմանատիպ հարց այլևս չի առաջանալու: Վերջ ի վերջո, կարող ենք փորձաքննության ուղարկել երկու երկրների սահմանադրությունները՝ պարզելու, թե արդյո՞ք այդ պնդումներն իրականության հետ աղերս ունեն»,- ասել է նա՝ հավելելով, որ միշտ էլ հնարավոր է որևէ պատրվակ գտնել:

«Մինչ այս պահը Ադրբեջանի հետ բանակցություններում փորձել ենք ամեն ինչի տակ հիմնավորում ունենալ, և այդ տրամաբանությամբ ենք աշխատել նրանց հետ: Կարծում եմ՝ շարունակությունն էլ կլինի տրամաբանված և հիմնավորված, այլ ոչ թե ներքին լսարանի համար կամ քաղաքական հայտարարություններով թելադրված»,- նշել է նա:

Հարցին, թե ի՞նչ մեխանիզմներով է սահմանադրությունն ուղարկվելու փորձաքննության, նա օրինակ է բերել. «Կարող ենք ուղարկել Վենետիկի հանձնաժողով երկու երկրների սահմանադրությունները, և թող Վենետիկի հանձնաժողովն ասի՝ նման բան կա, թե ոչ»:

Մինչ այդ նա հիշեցրել է հայկական կողմի փաստարկները, որոնք վկայում են, որ ՀՀ սահմանադրության մեջ որևէ տարածքային պահանջ չկա: