Սպիտակ տունը նշել է «Ամերիկայի ձայնի» ֆինանսավորման կրճատման պատճառը

Սպիտակ տունը հայտարարություն է տարածել «Ամերիկայի արմատական ձայնը» վերնագրով, որում ռադիոկայանի ֆինանսավորման կրճատման պատճառ է նշվում «արմատական ​​քարոզչությունը»։

Սպիտակ տան հաղորդման մեջ նշվում է, որ ԱՄՆ նախագահ Դոնալդ Թրամփի հրամանը, որը հրապարակվել է ուրբաթ օրը, երաշխավորում է, որ հարկատուները «այլևս կուլ չեն տա արմատական ​​քարոզչության խայծը»։

Սպիտակ տունը նաև մեջբերում է տարբեր լրագրողների հայտարարությունները, որոնք «Ամերիկայի ձայնը» մեղադրում են «խարդախության», Թրամփի դեմ հրապարակումների, «նեղ կուսակցական քաղաքական նպատակների պարտադրանքի» և այլնի մեջ։

Ավելի վաղ «Ամերիկայի ձայնի» տնօրեն Մայքլ Աբրամովիցը Facebook-ում գրել էր, որ իրեն արձակուրդի են ուղարկել 1300 հոգուց բաղկացած «ողջ անձնակազմի» հետ։

Այս հայտարարությունը հնչել է այն բանից հետո, երբ ԱՄՆ նախագահ Դոնալդ Թրամփը ստորագրել է «Ամերիկայի ձայնի» գլխավոր գործակալությունը փակելու հրամանը, հայտնում է CNN-ը։

«Ամերիկայի ձայն»-ի որոշ ռադիոկայաններ, որոնք հեռարձակվում են տեղական լեզուներով, դադարեցրել են լրատվական հաղորդումների հեռարձակումը և եթերաժամանակը լրացնելու համար երաժշտություն միացրել, ասել են ունկնդիրները:

Անգամ «Ամերիկայի ձայն»-ի գլխավոր խմբագիրներին կարգադրվել է դադարեցնել աշխատանքը, ուստի աշխատակիցներն ակնկալում են, որ ամբողջ աշխարհում լուրերի լուսաբանումը կդադարի, ըստ կես տասնյակ աղբյուրների, որոնք անանունության պայմանով զրուցել են CNN-ի հետ:

«Ամերիկայի ձայն»-ը ԱՄՆ գլոբալ մեդիայի գործակալության (USAGM) մի մասն է, որը նաև կառավարում է «Ազատ Եվրոպա», «Ազատ Ասիա» ռադիոկայանները և Մերձավոր Արևելքի հեռարձակման ցանցերը:

Ավելի վաղ ԱՄՆ նախագահը հրաման էր ստորագրել յոթ գործակալությունների, այդ թվում՝ USAGM-ի գործունեությունը դադարեցնելու մասին։