Վտանգ ՀՀ-ի համար. Ադրբեջանում ցանկանում են փակել ԿԽՄԿ գրասենյակը. Աբրահամյան

Ադրբեջանում քննարկվել է Կարմիր խաչի միջազգային կոմիտեի գրասենյակի փակման հնարավորությունը: Այս մասին ֆեյսբուքում գրել է ԱԺ ընդդիմադիր «Պատիվ ունեմ» խմբակցության պատգամավոր Տիգրան Աբրահամյանը:

Հայաստանի համար վտանգն այն է, որ գրասենյակի փակման հարցը արդիականացվել է Բաքվում հայ գերիների նկատմամբ «դատավարությունների» ֆոնին, նշում է ԱԺ պաշտպանության և անվտանգության հանձնաժողովի անդամը:

Վերջինս սա համարում է խիստ սուր խնդիր, հաշվի առնելով այն հանգամանքը, որ Բաքվի բանտերում գտնվող հայերի հետ կապը պահպանվում է հենց ԿԽՄԿ-ի գծով։

Աբրահամյանի խոսքով, ինչպես նախկինում տարբեր հասարակական և միջազգային կազմակերպությունների կամ անկախ լրատվամիջոցների դեպքում, որոնց գործունեությունը դադարեցված է, Ադրբեջանում նախ քարոզչական արշավ է ընթանում, սկսվում են տեղեկատվական գրոհներ, այնուհետև հնչում են մեղադրանքներ լրտեսական գործունեության կամ այլ դրվագների վերաբերյալ:

Հիշեցնենք՝ մի քանի տասնյակ ՀԿ-ներ հանդես են եկել բաց նամակով՝ ուղղված Կարմիր Խաչի միջազգային կոմիտեի նախագահ Միրյանա Սհոլյարիչ Էգերին՝ պահանջելով անհապաղ այցելել Բաքվի բանտում գտնվող Արցախի նախկին պետնախարար Ռուբեն Վարդանյանին։