Նոր, շինծու մեղադրանք՝ Ռուբեն Վարդանյանի հասցեին
Բաքվում այսօր շարունակվել է Արցախի նախկին պետնախարար Ռուբեն Վարդանյանի շինծու գործով ապօրինի դատավարությունը։ Դատական ֆարսի ժամանակ Ռուբեն Վարդանյանին Ադրբեջանի գլխավոր դատախազությունը «մեղադրանքներ» է առաջադրել։
Մասնավորապես, Վարդանյանին են վերագրել արտասահմանում ադրբեջանցի դիվանագետների դեմ «Նեմեսիս-2» ահաբեկչական գործողություն «նախաձեռնելը», իսկ մեղադրական վճռում նշել են, թե նա մեղադրվում է այն բանի համար, որ 2022 թվականի սեպտեմբերին «ապօրինաբար» հատել է «Ադրբեջանի պետական սահմանը» և Լաչինի միջանցքով եկել է ու բնակություն հաստատել «Ադրբեջանի՝ Ղարաբաղի տնտեսական շրջանում», որտեղ «ժամանակավորապես տեղակայված էին ռուս խաղաղապահները»։
Նշենք, որ ավելի վաղ հայտնել էինք, որ այսօր Բաքվի դատարանում Ռուբեն Վարդանյանը հայտարարել է, որ հրաժարվում է պետության կողմից տրամադրված պաշտպանից, և որ նրա իրավունքները պաշտպանելու է միայն պայմանագրով իր փաստաբան Աբրահամ Բերմանը։
