Միջուկային ավիակիր Harry S. Truman-ը բախվել է առևտրային նավի
ԱՄՆ ռազմածովային ուժերի վեցերորդ նավատորմի հաղորդագրության մեջ ասվում է, որ USS Harry S Truman-ը Միջերկրական ծովում բախվել է Բեշիքթաշ-Մ առևտրային նավին:
Բախումը տեղի է ունեցել փետրվարի 12-ին տեղական ժամանակով մոտավորապես 23:46-ին Միջերկրական ծովում՝ Պորտ Սաիդ քաղաքի մոտ (Եգիպտոս): Ավիակիրը, ներառյալ նրա շարժիչ համակարգերը, չեն տուժել, պարզաբանել են ռազմածովային ուժերը։ Հետաքննություն է սկսվել։
Ինչպես հաղորդում է MarineTraffic-ը, Բեշիքթաշ M բեռնատարը կրում է Պանամայի դրոշը: Նավը դուրս է եկել Պորտ Սաիդից և շարժվում է դեպի Ռումինիայի Կոնստանցա նավահանգիստ։
ԱՄՆ ռազմածովային ուժերի ավիակիր Harry S. Truman-ը վերջին մեկ տարվա ընթացքում մեծապես ներգրավված է եղել Մերձավոր Արևելքում, մասնավորապես Կարմիր ծովում գործող գործողություններում: 2024 թվականի դեկտեմբերին նա ժամանել է տարածաշրջան Եմենի հութիների կողմից առևտրային նավերի վրա հարձակումների ֆոնին: Այս ընթացքում, ըստ հութիների, ավիակիրը ենթարկվել է կրկնակի հարձակումների։
