Իրանի ԱԳ փոխնախարարը՝ ՀՀ-ի տարածքային ամբողջականության մասին

Իրանի արտաքին գործերի նախարարի քաղաքական հարցերով տեղակալ Մաջիդ Թախտ Ռավանչիին, անդրադառնալով ՀՀ տարածքային ամբողջականության վերաբերյալ Իրանի հստակ դիրքորոշմանը, նշել է, որ Իրանի Իսլամական Հանրապետությունը շարունակում է պահպանել իր դիրքորոշումը տարածաշրջանում աշխարհաքաղաքականության անփոփոխության հարցում։ Այս մասին հայտնել է «ԻՌՆԱ»-ն:

«Հայաստանի հետ հարաբերությունների զարգացումն առանձնահատուկ նշանակություն ունի Իրանի Իսլամական Հանրապետության արտաքին քաղաքականության մեջ, և դրա համար կան բոլոր անհրաժեշտ նախադրյալները»,- նշել է Թախտ Ռավանչիին Հայաստանի արտակարգ և լիազոր դեսպան Գրիգոր Հակոբյանի հետ հանդիպման ժամանակ:

Հակոբյանը, շնորհավորելով Իսլամական հեղափոխության հաղթանակի քառասունվեցամյակի առթիվ, նշել է, որ Իրանի հետ փոխադարձ հարգանքի և վստահության հիման վրա հարաբերությունների խորացումն առանձնահատուկ նշանակություն ունի ՀՀ կառավարության և ժողովրդի համար։