Թրամփի վարչակազմը ՀԴԲ-ի ղեկավարներից պահանջել է հրաժարական տալ

ԱՄՆ նախագահ Դոնալդ Թրամփի վարչակազմը Հետաքննությունների դաշնային բյուրոյի (ՀԴԲ) մի շարք բարձրաստիճան աշխատակիցներից պահանջել է հրաժարական տալ կամ թոշակի անցնել՝ սպառնալով հեռացնել աշխատանքից, եթե չկատարեն պահանջը, հայտնում է CBS-ը՝ վկայակոչելով երեք իրազեկ աղբյուրներ։

Նշվում է, որ կադրային որոշումներն ընդունվել են Սենատի հաստատման լսումների ժամանակ ՀԴԲ-ի ղեկավարի պաշտոնում Թրամփի թեկնածու Քեշ Փաթելի համար։

Փաթելը սենատորներին վստահեցրել է, որ ՀԴԲ-ի աշխատակիցների դեմ ցանկացած միջոց պետք է ձեռնարկվի միայն փաստական  և իրավական հիմքի առկայության դեպքում։

Նա ընդգծել է, որ չի անի անօրինական գործողություններ և կգործի բացառապես օրենքի շրջանակում։

Նա նաև խոստացել է, որ ՀԴԲ-ն չի ներգրավվի քաղաքական դրդապատճառներով հետապնդումների մեջ և  չի դառնա ռեպրեսիաների գործիք։