Լուկաշենկոն ասել է, թե որտեղ է տեղակայելու «Օրեշնիկ»-ը

Ռուսական նորագույն բալիստիկ «Օրեշնիկ» հրթիռի արձակման համակարգը, որը նախատեսվում է տեղադրել Բելառուսի տարածքում, կտեղակայվի Սմոլենսկին ավելի մոտ։ Հունվարի 26-ին համապատասխան հայտարարություններ է արել հանրապետության նախագահ Ալեքսանդր Լուկաշենկոն։

«Մենք բառացիորեն մի քանի օրից «Օրեշնիկ» կունենանք։ Մենք պայմանավորվել ենք նախագահ Պուտինի հետ, որ հաջորդ սարքավորումը նույնիսկ ավելի շուտ կմատակարարվի Բելառուս, քան Ռուսաստան»,-  ասել է նա՝ շփվելով լրագրողների հետ։

Ալեքսանդր Լուկաշենկոն 2024 թվականի դեկտեմբերին դիմել է Ռուսաստանի նախագահ Վլադիմիր Պուտինին՝ երկրի տարածքում «Օրեշնիկ» հրթիռային համակարգեր տեղակայելու խնդրանքով։ Պուտինը հաստատել է, որ նման ծրագրերը կարող են իրագործվել արդեն 2025 թվականին, ինչը դիտարկվում է որպես արևմտյան երկրների դեմ ռազմավարական զսպման մաս: Բելառուսի զինված ուժերի գլխավոր շտաբից գնդապետ Անդրեյ Բոգոդելը նշել է, որ այդ հրթիռների տեղակայումն ուղղված է Ռուսաստանին որպես թշնամի ընկալող երկրների կողմից ագրեսիայի կանխմանը: