Սարգսյանը՝ ծառայողների վերապատրաստումների մասին

Իմ հրամանով ձևավորված է աշխատանքային խումբ, որը պետք է վերլուծի վերջին տարիների մի շարք զանգվածային միջոցառումներ թե՛ ուժային միջոցի գործադրման տեսնակյունից, թե՛ մեթոդաբանական առումով, մարտավարական հմտությունների առումով պրոցեսը կազմակերպելու տեսանկյունից, որ հատվածներն է, որ լավ են կազմակերպվում, որտեղ ունենք թերություններ, խնդիրներ, և ինչպես պետք է կազմակերպել պրոցեսը: Այս մասին հայտարարել է ՆԳ նախարար Արփինե Սարգսյանը:

«Ուժային միջոցի գործադրման տեսանկյունից սկսել ենք մի խումբ վերապատրաստումներ մեր ծառայողների համար: Բնական է, որ ցանկացած նոր հարցի առնչվելիս կարող է նաև ինչ-որ տեղ մերժողականություն կամ ոչ պատրաստվածություն առաջ գալ: Մեր խնդիրն է լինելու, որ հետևողականորեն, ամբողջ տարվա ընթացքում, բոլոր ծառայողները պետք է վերապատրաստվեն այս ուժային ստանդարտով, որովհետև սա չի վերաբերելու միայն ոստիկանության գվարդիային, սա ամբողջ ոստիկանական համակարգի համար մշակված ստանդարտ է: Կարծում եմ՝ սա է ինստիտուցիոնալ ճանապարհը՝ խնդիրը ախտորոշելու և լուծելու. հակառակ դեպքում մենք կկենտրոնանանք տարբեր պատասխանատվության գործիքների կիրառման վրա: Դա պիտի լինի իրականության մեջ, դրան զուգահեռ պետությունը պետք է հասկանա, թե ինչ փոփոխություններ՝ որպես այդպիսին, պետք է ձեռնարկվեն այս տեսանկյունից»,- նշել է նախարարը: