ՌԴ-ն ցանկանում է վնասել համաշխարհային ավիաընկերություններին. Տուսկ
Ռուսաստանը ցանկանում է վնասել համաշխարհային ավիաընկերություններին: Այս մասին այսօր՝ հունվարի 15-ին, Կիևում հայտարարել է Լեհաստանի վարչապետ Դոնալդ Տուսկը։
Տուսկի խոսքով՝ Ռուսաստանը ծրագրում էր օդային ահաբեկչություն Լեհաստանի և այլ երկրների դեմ։ Լեհաստանի վարչապետը չի մանրամասնել, սակայն նշել է, որ Մոսկվան պատերազմ է մղում ողջ Արևմուտքի դեմ։
«Ես չեմ խորանա մանրամասների մեջ, բայց կարող եմ հաստատել, որ Ռուսաստանի Դաշնությունը ծրագրում է օդային ահաբեկչություն ավիաընկերությունների դեմ` ամբողջ աշխարհում... Այս դիվերսիոն գործողությունները սաբոտաժ են` պատերազմի մի տեսակ, որը Ռուսաստանը հայտարարել է ողջ աշխարհին, ոչ միայն Ուկրաինային»,- ասել է Լեհաստանի կառավարության ղեկավարը։
Նրա խոսքով՝ ռուսական ագրեսիայի դեմ պահանջվում են Արևմուտքի միասնական ջանքերը։ «Ագրեսորը պետք է միասնական պատասխան ստանա»,- ասել է նա:
Մամուլի ասուլիսում Տուսկը վստահեցրել է, որ Եվրոպան հավատում է այս պատերազմում Ուկրաինայի հաղթանակին։ Գործընկերներն ու դաշնակիցները մտադիր են շարունակել օգնել Կիևին` հետ մղել ռուսական չհրահրված ագրեսիան։ Իսկ Լեհաստանը դեռ մտադիր է այս հարցում առաջատար դեր խաղալ։
