Ինչու է Սրբուհի Գալյանը բոլոր իր տեղակալներին ազատել պաշտոններից

Կադրային փոփոխությունները բնական և անհրաժեշտ գործընթաց են: Այս մասին Կառավարության նիստից հետո լրագրողների հետ ճեպազրույցում հայտնեց Արդարադատության նախարար Սրբուհի Գալյանը:

«Իմ նշանակումից հետո նախարարի բոլոր տեղակալներն ազատվել են պաշտոններից։ Նորմալ է, որ փոփոխություններ պետք է տեղի ունենան։ Նախարարի իրավունքն է՝ աշխատել կամ չաշխատել որևէ տեղակալի հետ»,- ընդգծեց նա:

Գալյանը չմեկնաբանեց կադրային փոփոխությունների պատճառները՝ նշելով, որ դրանք հարցեր են, որ պատճառաբանություն չեն ենթադրում. «Օրենքի վրա հիմնված որոշումներ եմ կայացնում, օրենքը թույլատրում է, որ նման որոշումներ կայացնեմ»։

Ըստ նրա՝ խնդիրը կամայականությունը չէ, այլ՝ օրենքի բովանդակությունն ու պաշտոնի էությունը։