Վրաստանի ընդդիմության կոչը՝ ԵՄ-ին
ԵՄ-ին ուղղված քաղաքական ուժերի համատեղ կոչում ասվում է, որ Վրաստանի 4 խոշորագույն ընդդիմադիր կուսակցություն-դաշինքները Եվրամիությանը կոչ են արել «ինքնահռչակ Բիձինայի ռեժիմը ոչ լեգիտիմ» հայտարարել։
Նամակն ուղղված է Եվրամիության արտաքին գործերի և անվտանգության քաղաքականության գերագույն ներկայացուցիչ Կայա Կալասին և ԵՄ անդամ երկրների արտաքին գործերի նախարարներին։
Դիմումում ասվում է, որ Վրաստանը կանգնած է աննախադեպ քաղաքական ճգնաժամի առաջ, որը պահանջում է անհապաղ քայլեր Եվրամիության կողմից։
«Մենք՝ Վրաստանի քաղաքական կուսակցություններն ու դաշինքները քաղաքացիական հասարակության կազմակերպությունների և ցուցարարների հետ միասին համաձայն ենք, որ ներկայիս ճգնաժամի միակ լուծումը նոր ընտրությունների անցկացումն է բարելավված ընտրական համակարգում՝ քաղաքականապես հավասարակշռված ընտրական վարչակազմով և չեզոք պետական ինստիտուտներով», - ասված է նամակի մեջ։
