Սկանդալ ՔՊ-ում. ով է գրել Հակոբ Ասլանյանի տեքստը

«Քաղաքացիական պայմանագրի» հետ համագործակցությունս կասեցնելու վերաբերյալ իմ այսօրվա հայտարարությունը հիմնված է եղել սխալ տեղեկությունների վրա: Այս մասին ԱԺ պատգամավոր Հակոբ Ասլանյանը գրել է ֆեյսբուքյան իր էջում:

«Առավել եւս այս պարագայում հայտարարությունս համարում եմ սխալ եւ էմոցիոնալ: Հայտարարում եմ, որ շարունակում եմ մնալ «Քաղաքացիական պայմանագիր» կուսակցության եւ խմբակցության լիարժեք անդամ եւ գործելու եմ համաձայն կուսակցության ղեկավար մարմնի եւ խմբակցության որոշումների: Միեւնույն ժամանակ համաձայն եմ, որ «Քաղաքացիական պայմանագիր» կուսակցությունը պետք է առաջնորդվի բարեվարքության բարձր սկզբունքներով»,- գրել է նա:

Սակայն Ասլանյանը ևս մեկ էկրանակադր է հրապարակել, որտեղ երկխոսություն է ունեցել ՀՀ բարձր տեխնոլոգիական արդյունաբերության նախարար Մխիթար Հայրապետյանի հետ: Էկրանակադրից պարզ է դառնում, որ իր հայտարարությունից հրաժարվելու տեքստը Հակոբ Ասլանյանին SMS-ով ուղարկել է Մխիթար Հայրապետյանը:

Հիշեցնենք`  Հակոբ Ասլանյանը հայտարարել էր, որ մեկ ամսով կասեցնում է Քաղաքացիական պայմանագրի հետ համագործակցությունը՝ որոշումը պատճառաբանելով Հովիկ Աղազարյանի շուրջ տեղի ունեցող իրավիճակը։ Աղազարյանը ևս դուրս էր եկել «Քաղաքացիական պայմանագիր» խմբակցությունից, նրան գաղտնի ինֆորմացիայի արտահոսքի համար են մեղադրում։