ԱՄՆ-ն կմեծացնի միջուկային զինանոցը, ինչ սպառնալիքներ կան. WSJ

ԱՄՆ-ն կարող է իր միջուկային զինանոցի մեծացմանը գնալ Չինաստանից, ՌԴ-ից եւ ԿԺԴՀ-ից իբր եկող սպառնալիքների պատճառով, սակայն այդ որոշումը մնում է նախագահական ընտրություններում հաղթած Դոնալդ Թրամփի ապագա վարչակազմին։ Այս մասին հայտնում է Wall Street Journal թերթը՝ վկայակոչելով ԱՄՆ նախագահ Ջո Բայդենի վարչակազմի բարձրաստիճան պաշտոնյաներին:

«ԱՄՆ -ը պետք է պատրաստ լինի ընդլայնել իր միջուկային ուժերը Չինաստանից, Ռուսաստանից և ԿԺԴՀ-ից աճող սպառնալիքները կանխելու համար լրացուցիչ միջուկային սպառազինությունների տեղակայման մասին որոշումը կմնա Թրամփի եկող վարչակազմի հայեցողությանը, որը դեռ պետք է բարձրաձայնի իր պաշտպանական ծրագրերը», - գրում է պարբերականը:

Ինչպես նշում է թերթը, ԱՄՆ-ն սպառնալիք է տեսնում Չինաստանի եւ ԿԺԴՀ-ի ուժերի ավելացման, ինչպես նաեւ ռազմավարական հարձակողական սպառազինությունների կրճատման պայմանագրի շուրջ ՌԴ-ի հետ երկխոսության դադարեցման մեջ: Ընդ որում, իր առաջին նախագահական ժամկետի ընթացքում Թրամփը հավանություն է տվել միջուկային զենքի վերաբերյալ բոլոր խոշոր ծրագրերին, որոնք անցել են նախկին նախագահ Բարաք Օբամայի վարչակազմից: