Նրանք ոտնահարել են մեր ինքնիշխանությունը. Իրանի ԱԳՆ
Իրանի ներկայացուցչի խոսքով՝ Թեհրանն իր իրավունքից կօգտվի պատշաճ ժամանակին և պատշաճ ձևով։
Թեհրանը կօգտվի պաշտպանվելու իր իրավունքից՝ ի պատասխան Իրանի վրա Իսրայելի հարվածների, երբ հարմար գտնի: Այս մասին ՌԻԱ Նովոստիին ասել է Իրանի ԱԳ նախարարի ավագ խորհրդական Ալի Ասղար Հաջին՝ պատասխանելով հարցին, թե արդյոք Թեհրանը պատասխան պատրաստո՞ւմ է հոկտեմբերի վերջին Իսրայելի հասցրած հարվածների։
«Իսրայելի ագրեսիան ՄԱԿ-ի կանոնադրության և միջազգային իրավունքի խախտում է, նրանք ոտնահարել են մեր ինքնիշխանությունը: Մեր օրինական իրավունքն է պաշտպանվելը: Կարծում ենք, որ կարող ենք օգտվել այդ իրավունքից համապատասխան ժամանակին և պատշաճ ձևով», - ասել է իրանցի պաշտոնյան:
Հիշեցնենք, որ Իսրայելը հոկտեմբերի 1-ից «Հզբոլլահի» ուժերի դեմ ցամաքային գործողություն է իրականացնում Լիբանանի հարավում և շարունակում է օդային ռմբակոծությունները հարևան երկրում, որտեղ արդեն զոհվել է ավելի քան հազար մարդ, այդ թվում՝ շիա շարժման առաջնորդներ։ Ավելի քան 90 հազար մարդ փախստական է դարձել: Չնայած կորուստներին, այդ թվում՝ հրամանատարական կազմում, «Հզբոլլահը» ցամաքային մարտեր է մղում և չի դադարեցնում Իսրայելի տարածքի հրթիռակոծումը:
