Հս. Կորեան Ռուսաստանին կտրամադրի ռազմական օգնություն երկրի վրա հարձակման դեպքում. պայմանագիր

Հյուսիսային Կորեան վավերացրել է Ռուսաստանի հետ համապարփակ ռազմավարական գործընկերության համաձայնագիրը, հաղորդում է «Կորեայի ձայն» պետական ​​ռադիոն։ Համապատասխան հրամանագիրը հրապարակել է ԿԺԴՀ ղեկավար Կիմ Չեն Ինը։ Փաստաթղթի համաձայն՝ երկրները պարտավորվում են անհապաղ ռազմական օգնություն ցուցաբերել նրանցից մեկի վրա զինված հարձակման դեպքում։

Նոյեմբերի 9-ին պայմանագիրը վավերացնող օրենքը ստորագրել էր ՌԴ նախագահ Վլադիմիր Պուտինը։ Փաստաթուղթն ուժի մեջ կմտնի վավերագրերի փոխանակման օրվանից և կունենա անսահմանափակ ժամկետ։

Պայմանագրի չորրորդ հոդվածի համաձայն, եթե դրա մասնակիցներից մեկը ենթարկվի մեկ այլ պետության կամ մի շարք երկրների հարձակմանը, ապա մյուս մասնակիցը նրան կտրամադրի ռազմական և այլ օգնություն։ Փաստաթուղթը նաև ենթադրում է, որ Մոսկվան և Փհենյանը կկարողանան համատեղ զորավարժություններ անցկացնել՝ «պատերազմը կանխելու շահերից ելնելով պաշտպանական կարողություններն ամրապնդելու համար»։ Համաձայնագիրը նախատեսում է նաև համագործակցության զարգացում այլ ոլորտներում՝ գյուղատնտեսության, զբոսաշրջության, կրթության, առողջապահության ոլորտներում։