Արարատ Միրզոյանը COP-29-ի առաջին երկու օրերին կմեկնի Շվեդիա

Բաքվում կայանալիք Կլիմայական 29-րդ գագաթնաժողովին (COP-29) մասնակցելու հրավեր ստացած Հայաստանի արտգործնախարար Արարատ Միրզոյանը գագաթնաժողովի առաջին երկու օրերին աշխատանքային այցով կգտնվի Շվեդիայում, հայտնում է ՀՀ ԱԳՆ մամուլի ծառայությունը։

«Հայաստանի արտգործնախարար Արարատ Միրզոյանը նոյեմբերի 11-12-ը աշխատանքային այցով կգտնվի Շվեդիայում։Նախատեսված է Միրզոյանի հանդիպումը Շվեդիայի արտաքին գործերի նախարար Մարիա Մալմեր Շտեներգաարդի հետ։ Նախատեսվում են նաև երկկողմ հանդիպումներ գործադիր և օրենսդիր իշխանության այլ բարձրաստիճան պաշտոնյաների հետ»,- ասվում է ՀՀ ԱԳՆ Telegram-ի ալիքում հրապարակված հաղորդագրության մեջ։


Ավելի վաղ Հայաստանի ԱԳՆ ղեկավարի տեղակալ Պարույր Հովհաննիսյանը հայտնել էր, որ Հայաստանը հրավեր է ստացել մասնակցելու նոյեմբերի 11-22-ը Բաքվում կայանալիք կլիմայական միջազգային համաժողովին։ Հայաստանի վարչապետի աշխատակազմի ղեկավար Արայիկ Հարությունյանը լրագրողներին ասել էր, որ Բաքվում կայանալիք COP29 կլիմայական համաժողովին մասնակցելու հայկական կողմի որոշման վրա կարող է ազդել խաղաղության պայմանագրի շուրջ բանակցություններում զգալի առաջընթացը։