Ղարաքեշիշյանն ու ընտանիքի անդամները հրավիրվել են Դատախազություն

Ստեփանավանի նախկին քաղաքապետ Սարգիս Ղարաքեշիշյանն ու նրա ընտանիքի անդամները հոկտեմբերի 15–ին, ժամը 14:30–ին հրավիրվել են ՀՀ դատախազության ապօրինի ծագում ունեցող գույքի բռնագանձման գործերով վարչություն: Այս տեղեկությունը հրապարակված է «Ազդարար» պաշտոնական հայտարարությունների հարթակում։

«ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունում Ձեզ պատկանող գույքի առնչությամբ իրականացվում է ուսումնասիրություն, որի արդյունքում կազմվել է ամփոփագիր»,– ասված է դատախազության ծանուցագրի մեջ:

Դատախազություն են հրավիրվել նաև Ղարաքեշիշյանի կինը՝ Անահիտ Մկրտչյանը, զավակները՝ Ռիմա, Դավիթ և Արման Ղարաքեշիշյանները, հարսը՝ Քրիստինե Մելիքսեթյանը:

Նրանք իրավունք ունեն ծանուցագիրը ստանալու պահից սկսած մեկ ամսվա ընթացքում ներկայանալ ՀՀ դատախազության ապօրինի ծագում ունեցող գույքի բռնագանձման գործերով վարչություն՝ ծանոթանալու գործի նյութերին, ներկայացնելու դիրքորոշում, ինչպես նաև հայտարարագիր:

Սարգիս Ղարաքեշիշյանին և որդիներին մեղադրանք է առաջադրված, ըստ որի՝ նախկին քաղաքապետը Ստեփանավանի վարչական տարածքում գտնվող, քաղաքացիներին և իրավաբանական անձանց սեփականության իրավունքով չփոխանցվող հողամասերից տարբեր չափերով կտորները, ինչպես նաև համայնքին փոխանցված անշարժ գույքն օտարել է տարբեր անձանց: