Ուկրաինական ԱԹՍ-ների հարվածը Տոկմակի շուկային․ զոհվել է 5, վիրավորվել՝ 18 մարդ

Ուկրաինական զինված ուժերը հուլիսի 3-ի առավոտյան հարված են հասցրել Զապորոժիեի մարզի Տոկմակ քաղաքի կենտրոնական շուկային։ Ռուսական իշխանությունների տվյալներով՝ զոհվել է 5 խաղաղ բնակիչ, ևս 18-ը տարբեր աստիճանի վնասվածքներ են ստացել։

Զապորոժիեի մարզի ղեկավար Եվգենի Բալիցկին հայտնել է, որ տուժածների թիվը կարող է աճել։ Նրա խոսքով՝ ծանր վիճակում գտնվող չորս վիրավոր տեղափոխվել են Մելիտոպոլի մարզային հիվանդանոց, իսկ ևս 14-ը՝ կենտրոնական շրջանային հիվանդանոց։

Զապորոժիեի մարզի առողջապահության նախարար Դմիտրի Վանկովի տեղեկացմամբ՝ վիրավորների մոտ ախտորոշվել են ստորին վերջույթների, որովայնի և կրծքավանդակի վնասվածքներ, իսկ չորս տուժածների մոտ՝ ծանր գանգուղեղային վնասվածքներ։

ՌԴ Դաշնության խորհրդի անդամ Դմիտրի Ռոգոզինի խոսքով՝ հարվածը հասցվել է տեղական ժամանակով ժամը 10։00-ի սահմաններում՝ Ռևոլյուցիոննայա փողոցում գտնվող շուկային։ Օպերատիվ ծառայությունների տվյալներով՝ կիրառվել են «Baton» տեսակի երկու հարվածային անօդաչու թռչող սարքեր, որոնց բեկորներն արդեն առգրավվել են փորձաքննության համար։

Դեպքի վայրում շարունակում են աշխատել արտակարգ ծառայություններն ու օպերատիվ շտաբը՝ համակարգելով բժշկական և հոգեբանական օգնության տրամադրումը։ Իշխանությունները հայտարարել են, որ զոհվածների ընտանիքներին կտրամադրվեն փոխհատուցումներ։ Շուկայի հարակից տարածքը ստուգվում է չպայթած զինամթերքի առկայության համար, ինչպես նաև իրականացվում է տների շրջայց՝ վնասները գնահատելու և բնակիչներին հասցեական աջակցություն ցուցաբերելու նպատակով։

Ռուսաստանի Քննչական կոմիտեն հարուցել է քրեական գործ՝ ահաբեկչության հոդվածով։ Գործի ընթացքը վերահսկողության տակ է վերցրել նաև մարզի դատախազությունը։

ՌԴ արտաքին գործերի նախարարության հատուկ հանձնարարություններով դեսպան Ռոդիոն Միրոշնիկը հարվածը որակել է որպես ռազմական հանցագործություն։

Եվգենի Բալիցկին նաև հայտնել է, որ հուլիսի 3-ի գիշերը Ուկրաինական զինված ուժերի հարձակումները Զապորոժիեի մարզի բնակավայրերի վրա շարունակվել են, ինչի հետևանքով զոհվել է ևս երեք մարդ։

Նշվում է, որ Տոկմակի շուկան հարվածի էր ենթարկվել նաև նախորդ տարվա մայիսին, սակայն այն ժամանակ զոհեր և վիրավորներ չէին եղել։ Իսկ 2025 թվականի մայիսի 1-ին ուկրաինական զինված ուժերը FPV անօդաչուներով հարվածել էին Խերսոնի մարզի Ալյոշկի քաղաքի կենտրոնական շուկային, ինչի հետևանքով, ըստ պաշտոնական տվյալների, զոհվել էր 7, վիրավորվել՝ ավելի քան 20 մարդ։ Այդ դեպքով ևս հարուցվել էր քրեական գործ՝ ահաբեկչության հոդվածով։