ՏԵՍԱՆՅՈՒԹ. Իսրայելը շարունակում է հրթիռակոծել Լիբանանը. նոր տվյալներ

Բեյրութի (Լիբանան) հարավային արվարձանում զանգվածային ավերածություններ են գրանցվել առավոտյան իսրայելական հարվածներից հետո: Այս մասին հայտնել է RT գործակալությունը՝ հրապարակելով Պաղեստինյան Quds news գործակալության տեղեկությունը:

Ավելի վաղ Լիբանանի կառավարությունը հայտնել էր, որ երկրի ավելի քան 2 հազար բնակիչ է զոհվել ՑԱԽԱԼ-ի հարվածների հետևանքով հակամարտության սրման սկզբից ի վեր:

Իսրայելը գիշերը մոտ 20 հարված է հասցրել Բեյրութի օդանավակայանի հարակից տարածքին

Հերթական էսկալացիան սկսվել է սեպտեմբերի 17-ին և 18-ին Լիբանանի տարբեր շրջաններում կապի միջոցների զանգվածային պայթյուններից հետո, որոնց հետևանքով տասնյակ մարդիկ են մահացել, շուրջ երեք հազար քաղաքացի վիրավորվել է: Ավելի ուշ իսրայելական ավիացիան հարվածել է Բեյրութի հարավային արվարձանում գտնվող բնակելի շենքին, ինչի հետևանքով զոհվել է ավելի քան 50 մարդ, այդ թվում՝ «Հզբոլլահի» հատուկ գործողությունների ուժերի հրամանատար Իբրահիմ Աքիլը:

Շիական դիմադրության մարտիկներն ի պատասխան հարձակվել են Իսրայելի Ռազմաօդային ուժերի «Ռամաթ-Դավիդ» բազայի և Հայֆայի հյուսիսում գտնվող «Ռաֆայել» ռազմարդյունաբերական համալիրի վրա: Մի քանի հրթիռ է պայթել իսրայելական քաղաքի ծայրամասերում գտնվող բնակելի թաղամասերում։