Մոսկվայի կայազորային ռազմական դատարանը կալանավորել է նախկին փաստաբան Էլման Փաշաևին՝ Բլինովսկիների ընտանիքի նկատմամբ կատարած խարդախության գործով։ Այս մասին հայտնում է ՌԻԱ Նովոստին:

«Բավարարել նախաքննության միջնորդությունը, կասկածյալ Փաշաևի նկատմամբ որպես խափանման միջոց ընտրել կալանք՝ երկու ամիս ժամկետով»,-որոշումը հրապարակել է դատավոր Մաքսիմ Իվանովը:

Փաշաևը կալանավորվել է մինչև նոյեմբերի 15-ը։

Դատական նիստն ընթացել է դռնփակ ռեժիմով։ Պատճառը, թե ինչու է որոշվել գործընթացն իրականացնել ոչ հրապարակային՝ չի բացահայտվել:

Սեպտեմբերի 17-ին ՌԴ քննչական կոմիտեն հայտնել էր, որ Փաշաևի դեմ քրեական գործ է հարուցվել Քրեական օրենսգրքի 159-րդ հոդվածի 4-րդ մասի հատկանիշներով (առանձնապես խոշոր չափերով խարդախություն)․ նա ձերբակալվել էր: Քննությամբ պարզվել է, որ Փաշաևը 2024 թվականի փետրվարին Մոսկվայում բլոգեր Ելենա Բլինովսկայայի ամուսնու՝ Ալեքսեյ Բլինովսկու հետ հանդիպման ժամանակ համոզել է, որ խոշոր դրամական պարգևի դիմաց կարող է նրանց ազատել քրեական պատասխանատվությունից։ Պայմանավորվածություն ձեռք բերելուց հետո Փաշաևը Բլինովսկուց առանձնապես խոշոր չափի դրամական միջոցներ է ստացել։