ՏԵՍԱՆՅՈՒԹ․ Մենք էլ ենք շահագրգիռ, որ ՀՀ-ն զարգանա, բայց ոչ դրա հաշվին. վարդենուտցին՝ նախարարին

Կառավարության մոտ բողոքի ակցիայի դուրս եկած Արագածոտնի մարզի Վարդենուտ գյուղի բնակիչներին հանդիպեց Էկոնոմիկայի նախարար Գևորգ Պապոյանը։

Բնակիչները պահանջում են, որ իրենց հողերի համար, որոնք գերակա շահ են ճանաչվել, համարժեք փոխհատուցում տրամադրվի։

Նախարարը նշեց, որ կառավարությունն իրավասու չէ ստիպել ներդրողին՝ համարժեք վճարել։

Բնակիչները ներկայացրեցին խնդիրը, ըստ որի, փաստաթղթերով ներկայացված են եղել, որ հողերն անջրդի են, ըստ այդմ էլ հարկերը հավաքագրվել են։ Բայց իրականում այդ հողերը ջրվում են։

«Ես տեսել եմ, որ դրանք ջրովի հողեր են, միևնույն ժամանակ իմ աչքերը տեսել են, որ թղթի վրա գրված է, որ անջրդի հողեր են, սա է մեր իրականությունը և թղթի տարբերությունը»,-ասաց նախարարը։

Բնակիչներից մեկն էլ նշեց․«Հիմա պետք է ակնադիտական եղանակով տեսածը գրվի գնահատման հաշվետվությունների համար։ Մենք էլ շահագրգիռ ենք, որ ՀՀ-ն զարգանա, բայց ոչ մեր անձնական միջոցները կորցնելու հաշվին։ Հիմա քանի որ կառավարությունը մաս է գործընթացին, Ձեր օժանդակությունն ենք խնդրում, որ գանք կոմպրոմիսի և ակնկալում ենք նույնը դիմացինի կողմից։ Մենք միտում չունենք խոչընդոտելու և ցանկանում ենք հասնել կարճ լուծման»։

Նախարար Պապոյանն ասաց, որ կփորձեն կապ հաստատել ներդրողի հետ և նոր՝ նախկին առաջարկած գնից պակաս գնի առաջարկը փոխանցեն վերջինիս։

Մանրամասները՝ տեսանյութում։