Google Chrome-ը կորցրել է 15 միլիոն օգտատերերի գաղտնաբառերը

Հուլիսին Google Chrome բրաուզերում զանգվածային խափանում է տեղի ունեցել, որի պատճառով Windows-ի միլիոնավոր օգտատերեր զրկվել են պահպանված գաղտնաբառերին մուտք գործելու հնարավորությունից: Այս մասին հայտնում է Forbes-ը։

Առաջացած խնդրի պատճառով օգտատերերը չեն կարողացել գտնել իրենց հին գաղտնաբառերը և պահպանել նորերը։ Ենթադրվում է, որ խնդիրը ազդել է Windows-ի Chrome 127 օգտագործողների մոտավորապես 2% - ի վրա, ինչը կազմում է մոտավորապես 15 միլիոն մարդ: Այնուամենայնիվ, հաշվի առնելով, որ Chrome-ն օգտագործվում է ավելի քան 3 միլիարդ մարդու կողմից, այդ ցուցանիշը կարող է ավելի բարձր լինել:

Google-ի առաջարկած ժամանակավոր լուծումը պահանջում էր բրաուզերը գործարկել հրամանի տողի միջոցով՝ օգտագործելով «enable-features=SkipUndecryptablePasswords» գրվածքը, ինչը օգտվողների մեծամասնության համար անհարմար էր: Այնուամենայնիվ, ընկերությունը արագ արձագանքեց միջադեպին և արդեն հուլիսի 25-ին թողարկեց սխալի ուղղումը, որը պահանջում էր ընդամենը վերագործարկել բրաուզերը:

Google-ը ներողություն է խնդրել պատճառած անհարմարությունների համար և խորհուրդ է տվել խնդրի առաջ կանգնած օգտատերերին դիմել Google Workspace-ի աջակցման ծառայությանը:

Ավելի վաղ հաղորդվել էր, որ Chrome-ը ամենաարագ, բայց խնդրահարույց բրաուզերն է։