ՏԵՍԱՆՅՈՒԹ. Բրիտանացի բնապահպան ակտիվիստները պղծել են Սթոունհենջը

Բնապահպան ակտիվիստները, որոնք պահանջում են դադարեցնել նավթի արդյունահանումը, ներկ են լցրել Մեծ Բրիտանիայի Սթոունհենջ քարե մեգալիթյան կառույցի վրա: Այս մասին հայտնում է LBC տեղական ռադիոկայանը։

Լրագրողների տեղեկություններով՝ դեպքը տեղի է ունեցել ամառային արևադարձին նախորդող օրը։ Բնապահպանները նարնջագույն ներկով ողողել են առնվազն երկու հսկա քարե մոնոլիտներ:

Հոդվածի հեղինակներն ընդգծել են, որ ակցիայի կազմակերպիչները Just Stop Oil շարժման մասնակիցներ են։ Շարժման անդամները Մեծ Բրիտանիայի կառավարությունից պահանջել են ստորագրել իրավաբանորեն պարտադիր պայմանագիր՝ հանածո վառելիքի օգտագործումը մինչև ընթացիկ տասնամյակի վերջը աստիճանաբար դադարեցնելու մասին: Եթե ​​երկրի իշխանությունները չկատարեն այս պահանջը, Just Stop Oil-ը մտադիր է բողոքի ակցիաներին ներգրավել համախոհների Նորվեգիայից, Ավստրիայից և այլ երկրներից:

Բրիտանական ոստիկանության տվյալներով՝ Սթոունհենջի պղծումից հետո երկու մարդ է բերման ենթարկվել։

Մեծ Բրիտանիայի վարչապետ Ռիշի Սունակն այս դեպքի առնչությամբ իր X հարթակում (նախկինում Twitter) գրել է, որ բողոքի ակցիան «վանդալիզմի խայտառակ օրինակ» է ամբողջ աշխարհի հնագույն հուշարձաններից մեկի դեմ։