Կիրանց գյուղի Սուրբ Երրորդություն եկեղեցին կվերականգնվի
Կառավարությունն իր այսօրվա՝ հունսիի 14-ի նիստում շուրջ 66 մլն դրամ գումար հատկացրեց Տավուշի մարզի Կիրանց գյուղի Սուրբ Երրորդություն եկեղեցու վերականգնման աշխատանքների ձեռքբերման նպատակով:
Որոշման հիմնավորման մեջ նշվում է, որ Կիրանց գյուղում է գտնվում նորահայտ տեղական նշանակության հուշարձանի կարգավիճակ ստացած 19-րդ դարի Սբ. Երրորդություն եկեղեցին: Խորհրդային տարիներին այն երկար ժամանակ օգտագործվել է որպես պահեստ, այժմ ամբողջությամբ ավերված է եկեղեցու տանիքը, պատերի որոշ հատվածներում առկա են ճաքեր, քանդված է սալահատակը, կարիք կա նաև եկեղեցու տարածքի բարեկարգման։
Խորհրդային տարիների միջամտության արդյունքում որոշ տեղերում փակվել են նաև եկեղեցու մուտքերը կամ պատուհանները, կատարվել են այլ միջամտություններ, որոնք նախատեսվում է վերացնել վերականգնման նախագծով։
Այս որոշմամբ նախատեսվում է գումար հատկացնել եկեղեցու վերականգնման և զանգաշտարակ-ռոտոնդայի տեղադրման համար:
Նշենք, որ որոշման նախագծի ընդունման արդյունքում կվերականգնվի Տավուշի մարզի Կիրանց գյուղի Սուրբ Երրորդություն եկեղեցին և կտեղադրվի զանգաշտարակ-ռոտոնդան:
