«Կհստակեցնենք, թե քանի ինքնաթիռ կարող է փոխանցել Ֆրանսիան». Էմանյուել Մակրոն
Ֆրանսիայի նախագահ Էմանյուել Մակրոնը հայտարարել է Mirage կործանիչների համար օդաչուների և մեխանիկների պատրաստման մեկնարկի մասին, որոնք Փարիզը խոստանում է տրամադրել Կիևին։ Այդ մասին նա հայտարարել է Փարիզում Ուկրաինայի նախագահ Վլադիմիր Զելենսկու հետ համատեղ մամուլի ասուլիսին։
Mirage 2000-ը չորրորդ սերնդի բազմաֆունկցիոնալ միաշարժիչ կործանիչ է: Մակրոնը հրաժարվել է նշել ինքնաթիռների ճշգրիտ քանակը։
«Մենք պայմանավորվել ենք կարիքների շուրջ, այժմ առաջնահերթությունը օդաչուների և մեխանիկների պատրաստումն է, որից հետո մենք կհստակեցնենք, թե քանի ինքնաթիռ կարող է փոխանցել Ֆրանսիան», - պարզաբանել է նա:
Մակրոնի խոսքով՝ նախատեսվում է պատրաստել 4500 ուկրաինացի զինվորականի։
